A e tinna asebedo ka ahero chwech. Joodwa ne jodhi bayo kuonde ma ne nitie yiende mang’eny kod nembe mabeyo ma ne ni machiegni gi taon mar Jyväskylä, e Central Finland. Le bende ahero ahinya. Kata kane pod an nyathi, ne adwaro tugo gi paka kata guok moro amora ma ne aneno. Kane adongo, ne awinjo malit neno ka ji sando le. Bang’e, ne adonjo e riwruok moro ma ne kedo ne ratiro mag le kendo ne aromo gi joma ne nigi paro machalo koda.

Ne watimo kinda kedo ne ratiro mag le. Ne walando weche e wi ratiro mag le kendo ne wachano wuodhe mag kwedo dukni mauso gik miloso gi yie le kendo kwedo laboratori mitemoe yedhe kuom le. Bende ne waloso riwruok mar rito ngima le. Nikech ne wakawo okenge madongo mondo wachop gik ma ne wadwaro, kinde mang’eny mano ne chandowa gi sirkal. Ne omaka nyading’eny kitera e kot.

Mopogore gi dewo le, nitie gik mang’eny ma timore e piny ma ne ok mora. Omiyo, bang’e ne atiyo gi riwruoge mang’eny moriwo kata Amnesty International kod Greenpeace. Ne ariwogi lwedo gi chunya duto. Ne akedo ne ratiro mag joma odhier, joma nigi kech, koda jochan mamoko.

Mosmos, ne afwenyo ni ok anyal kelo lokruok e pinyni. Kata obedo ni riwruogego ne omiyo okaw okenge mag loyo chandruoge moko matindo, chandruoge madongo to ne medo mana bedo marach moloyo. Ne chalo ka gima gik maricho lilo ema ne timore e piny to onge ng’ama ne dewo. Ne achalo ng’ama goyo le e kidi.

Ka koro chunya onyosore nikech ne afwenyo ni onge lokruok ma ne anyalo kelo, ne achako paro e wi Nyasaye kod Muma. Noyudo asepuonjora  Muma kinde moro chon gi Joneno mag Jehova. Kata obedo ni ne amor gi kaka Joneno ne nyisa ng’wono kendo ne odewa, gie kindeno, ne ok aikora timo lokruok e ngimana. Kata kamano, wang’ni to ne aneno weche e yo mopogore.

Ne achako somo Muma kendo mano ne ojiwa ahinya. Ne ayudo ndiko mang’eny ma Muma nyisowae ni kik wasand le. Kuom ranyisi, Ngeche 12:10 wacho ni “ng’at makare oparo jambe gibedi mangima.” Ne afwenyo bende ni Nyasaye ok ema kel chandruoge mwayudo e pinyka. Kar mano, ne ayudo ni chandruogewa medore nikech thoth ji ok luw chike Nyasaye. Ne amor ahinya puonjora e wi hera mar Jehova kendo ng’eyo ni en Nyasaye ma nano gi joge.—Zaburi 103:8-14.

Gie kindeni, ne ayudo sanduk ma ne anyalo kwayogo bug Ang’o ma Muma Puonjo Kuom Adier? mi ne apong’ogo ma aoro. Mapiyo nono, dichwo moro gi chiege ma ne gin Joneno ne obiro lima kendo ne gichiwore mar puonja Muma, mi ne arwako chenrono. E wi mano, ne achako dhi e chokruoge mag Joneno e Od Romo. Mano ne omiyo adiera mag Muma ochako gurore e chunya.

Muma ne okonya ahinya timo lokruoge mang’eny e ngimana. Ne aweyo madho ndawa koda mer. Ne achako rwakora maler kendo ne aweyo tiyo gi weche mochido. Ne atimo lokruok e paro ma ne an-go kuom sirkal. (Jo Rumi 13:1) Bende, ne aweyo ngima mar anjawo ma ne asikorae ahinya.

Gima ne tekna moloyo ne en weyo riwruoge makedo ne ratiro mag dhano kod le. Timo kamano ne okawa kinde. Mokwongo, ne aneno ni wuok e riwruok ma kamago ne chalo ka gima aringogi. Kata kamano, ne apuonjora ni Pinyruodh Nyasaye kende ema nyalo kelo lokruok e pinyni. Ne ang’ado mar tiyo gi tekona duto e riwo lwedo Pinyruodhno kendo konyo jomoko opuonjre e wi Pinyruodhno.—Mathayo 6:33.

Kane akedo ne ratiro kamano, ne aketo ji e kidienje ariyo—joma beyo kod joma richo—kendo ne aikora kedo gi jogo ma ne akwano kaka joma richo. Sani to amor ni puonj ma aseyudo e Muma osekonya kik asin gi ji. Kar mano, atemo nyiso ji duto hera mar Jokristo. (Mathayo 5:44) Yo achiel ma anyisogo herani en kuom lando ne ji wach maber mar Pinyruodh Nyasaye. Amor neno kaka tijni kelo ne ji kuwe koda mor kendo miyogi geno madier ne kinde mabiro.

Nikech aweyo weche e lwet Jehova, asebedo gi kuwe e chunya. An gadier ni bedo ni en e Jachwech, ok obi weyo mondo osand dhano koda le nyaka chieng’ kendo ok obi weyo piny majaberni okethre chuth. Mopogore gi mano, kokalo kuom Pinyruodhe obiro loso gik moko duto mosekethore e pinyni. (Isaiah 11:1-9) Ayudo mor mogundho ok mana kuom ng’eyo adieragi, to bende kuom konyo ji mondo oket yie e wechegi. Tinde ok ane ni nyaka akel lokruok e piny.