E bug Ruth mayudore e Muma, ok nyiswa nying ng’at moro ma ne otamore chopo ting’ mare kaka Chik Musa ne dwaro. (Ruth 4:1-12) Be mano onego omi wapar ni ji duto miwuoyo kuomgi e Muma to ok onyiswa nyingegi, ne gin joma richo kata joma nono?

Ooyo. Ne ane ranyisi machielo. Kane Yesu timo ikruok ne Pasakane mogik e piny, nonyiso jopuonjrene mondo odhi oik gik moko e dala ng’at moro ma nodak Jerusalem ma noluongo mana ni “ng’ane.” (Mathayo 26:18) Be onego watiek ni ng’at miluongo ni “ng’ane” e ndikoni ne en ng’ama rach kata ng’at manono ahinya? Ooyo ngang’, nikech ng’atno ne en japuonjre Yesu. Nikech ng’eyo nying ng’atni ne ok ochuno, ne owe maok ohul nyinge.

E wi mano, Muma oting’o nying joma richo mang’eny koda ranyisi mag joma kare mang’eny maok ohul nyingegi. Kuom ranyisi, ji ong’eyo ahinya nying Hawa, dhako ma ne okwong chwe. Kata kamano, nikech ne ok owinjo wach, ne omiyo Adam odonjo e richo mosekelo ne dhano duto chandruok mang’eny ahinya. (Jo Rumi 5:12) Mopogore gi mano, Ndiko ok hul nying chi Noa, to ne en dhako ma ne ochiwore kendo ma ne owinjo chwore koriwe lwedo e tich maduong’ ma ne Nyasaye omiyogi. Bedo ni nyinge onge e Muma, ok nyis ni ne en ng’at manono kata ng’at ma ne Nyasaye ok ohero.

Nitie jomamoko miwuoyo kuomgi e Muma ma nochopo migepe madongo e dwach Jehova, to ok ohulnwa nyingegi. Par ane nya Israel ma ne en misumba e od Naaman, jatend lweny ma Siria. Nowuoyo gi chi Naaman ka en gi chir e wi janabi mar Jehova ma ne nitie e piny Israel. Mani nomiyo hono maduong’ otimore ne Naaman. (2 Ruodhi 5:1-14) Ranyisi machielo en mar nyar Jeftha ma bende noketo ranyisi maber miwuoro e wach nyiso yie. Ne oyie mondo kik kende kendo obed maonge nyithindo mondo ochop gima wuon mare nosingo ne Nyasaye. (Jobura 11:30-40) Bende, nitie jondik zaburi makalo 40 maok ohul nyingegi kaachiel kod jonabi mabwora ma ne otiyo ne Nyasaye kendo nochopo migepe madongo maok owach nyingegi e Muma.—1 Ruodhi 20:37-43.

To gima nyalo kawowa gi wuoro en ni kuom malaike tara gi tara matiyo ne Nyasaye, Muma nyisowa mana nyinge malaike ariyo kende—Gabriel kod Mikael. (Daniel 7:10; Luka 1:19; Juda 9) To mokogo duto Muma ok nyiswa nyingegi. Kuom ranyisi, Manoa wuon Samson nopenjo malaika moro kama: “Nyingi to ng’a, ma ka wecheni osetimore to dwanyal miyoi duong’?” Malaikano nodwoke nang’o? “Marang’o ipenja nyinga?” Malaikano ne onyiso bolruok kotamore kawo duong’ ma ne owinjore mana gi Nyasaye.—Jobura 13:17, 18.

Muma ok ler gimomiyo jomoko ohul nyingegi to moko to ok ohul. Kata kamano, wanyalo puonjore weche mang’eny koa kuom joma ne otiyo ne Nyasaye to ok ohul nyingegi e Muma. Ne gin joma obolore ma ne ok ogeno yudo duong’ kata huma moro amora.