WACH MA NG’E GASET WUOYOE: ANG’O MOMIYO CHANDRUOK NG’ENY AHINYA? GINIRUM KARANG’O?
Ji Mang’eny Tho Kayiem Nono
Nyathi moro miluongo ni Noelle ne en nyako mohero ji kendo mohero goro gik moko. Chieng’ moro godhiambo, kodong’ mana jumbe ariyo to obed jahigni ang’wen, ne oling’ore kargi mar goyo abal ma otho.
Desemba tarik 14, 2012 e skul moro mantie Connecticut e piny Amerka, janek moro ne onego ji 26 gi bunde. Ji 20 kuom joma ne onegogo ne gin nyithindo ma johigni 6 kata 7. Kane iyikogi, Ker Obama ne oluongo nying nyithindogo achiel achiel—Charlotte, Daniel, Olivia, Josephine kod mamoko, kae to nowacho kama: “Nyaka wane ni watieko masiche ma kamagi.”
E higa mar 1996, nyako moro miluongo ni Bano ma ne jahigni apar gaboro, ne odar kaachiel gi joodgi ka giwuok e pinygi Iraq ma gidhi Norway. Osiepege ne ochake ni Sun Rays, nying manyiso ni ne en ng’ama mor gi ji. Gima lit en ni Julai 22, 2011, Bano ne en achiel kuom ji 77 ma ne janek moro ong’ado ngimagi, kendo janekno bang’e nong’ayo wach niya: “Mad ne anegie ji mang’eny mokalo kanyo!”
Gik maricho kaka mago osebedo ka timore kuonde mang’eny e piny mangima. Par ane rem kod kuyo ma ji mang’eny oseyudo nikech aksident, timbe mahundu, lweny, koda masiche mamoko maok nyal geng’ kaachiel gi chandruoge mamoko. Oseng’ad ngima ji mang’eny kayiem nono kendo ji mang’eny osesandore maonge gimomiyo!
Jomoko keto ketho kuom Nyasaye ka giwacho ni Jachwechwa ok odewo oganda dhano. Jomoko to wacho ni Nyasaye neno kaka wachandore to oweyowa aweya. To jomoko wacho ni masiche kaka mago gin chenro mag Nyasaye. Ji nigi paro mopogore opogore kuom gimomiyo ji chandore. Ere kama wanyalo yudoe adiera e wi wachni? E sula maluwogi, wabiro nono gima Muma ma en Wach Nyasaye, wacho e wi gimomiyo chandruok nitie kod kaka ibiro tiek chandruok.
