Higni madirom 400 bang’ kane osetiek ndik bug Muma mogik e dho-Hibrania, weche ma ne janabi Mika okoro e wi Mesia ne ochopo: Yesu ne onyuol e dala mar Bethlehem. Higni moko 30 bang’e, e higa mar 29 E. N., wach mokwongo ma ne janabi Daniel okoro e wi Mesia ne ochopo. Ne obatis Yesu kendo Nyasaye ne owale kuom roho maler. Mesia, ma en Kodhi ma ne osebed kirito kuom kinde, ne obiro e kinde ma ne oketi!

Gikanyono, Yesu ne ochako tije mar lando “wach maber mar pinyruodh Nyasaye.” (Luka 8:1) Yesu ne en ng’ama ng’won, ng’ama muol, kendo ma dewo jomoko mana kaka ne osekor. Ne opuonjo e yor hera, kendo puonjne ne gin matiyo. Nochango “midekre duto” ka nyiso ni Nyasaye ne ni kode. (Mathayo 4:23) Ji mang’eny ma hikgi opogore opogore ne olworo Yesu kendo ne giwacho niya: “Wasenwang’o Mesia”!—Johana 1:41.

Yesu ne okoro ni kapok Pinyruodhe okawo loch, lweny ne dhi bedoe, piny ne dhi yiengni, kendo chandruoge mamoko be ne dhi bedoe. Ne ojiwo ji duto niya: “Nenuru.”—Mariko 13:37.

Yesu ne en ng’ama kare kendo ma ne winjo Nyasaye kinde duto. Kata kamano, nitie joma ne mon kode mi gichweyo ginege. Thone ne oyawonwa yo mar yudo gima Adam gi Hawa nolalo, ma en ngima mochwere e Paradis.

Mana kaka tho Yesu ne ochopo weche ma ne okor, chier ma ne Nyasaye ochierego ndalo adek bang’ thone, be ne ochopo weche ma ne okor. Bang’ chierne, ne onenore ne jopuonjrene mokalo 500. Kapok odok e i polo, Yesu ne ochiko jolupne mondo oland wach maber mar Pinyruodhe ne ji e “ogendini duto.” (Mathayo 28:19) Ne gitiyo tijno e okang’ maromo nade?

—Kaluwore gi Mathayo, Mariko, Luka, Johana, 1 Jo Korintho.