Be iyie kuom singo ma Muma chiwo ni ibiro chier jomotho? * Geno mar neno osiepewa kod wedewa ma ne osetho en geno ma morowa ndi, donge? Kata kamano, be ibiro chier ji adier? Mondo wadwok penjono, we wanon ane ranyisi mar joote Yesu Kristo.

Joote Yesu ne oyie chuth ni jomotho nochier. Nikech ang’o? Nikech gik moko maok tin ne ariyo. Mokwongo, genogi ne otenore kuom adierani: Yesu owuon ne ochier. Jootego—kod “owete moloyo piero apar abich chieng’ achiel”—ne oneno Yesu bang’ chierne. (1 Jo Korintho 15:6) E wi mano, ji mang’eny noyie ni ne ochier Yesu mana kaka buge ang’wen mag Injili nyiso.—Mathayo 27:62–28:20; Mariko 16:1-8; Luka 24:1-53; Johana 20:1–21:25.

Mar ariyo, joote Yesu noseneno ka Yesu chiero ji maok tin ne adek—ng’at mokwongo ma ne gineno ka Yesu chiero ne ni e dala mar Nain, ng’at mar ariyo ne ni e dala mar Kapernaum, to ng’at mar adek, ne ni e dala mar Bethania. (Luka 7:11-17; 8:49-56; Johana 11:1-44) Chier mar adek ema owuo kuome e gasedni motelo, kendo ng’ama nochierno kaachiel gi joodgi, ne gin osiepe Yesu. We wanon ane weche momedore kuom gima ne otimore.

Yesu ne owacho ne Maritha ma ne oyudo owadgi ma Lazaro osetho kuom ndalo ang’wen niya: “Omeru nochier.” Mokwongo, Maritha ne ok ong’eyo tiend weche ma ne Yesu onyisego. Maritha nonyiso Yesu ni “ang’eyo ni nochier” koparo ni owadgi ne dhi chier kinde moro ma biro. Parie kaka Maritha ne mor ni bang’ Yesu wacho ni “an e chier, kendo an e ngima,” nochiero owadgi ma ne osetho!—Johana 11:23-25.

Lazaro ne ni kanye kuom ndalo ang’wen ma ne oyudo othogogo? Onge gimoro amora ma ne Lazaro owacho ma nyiso ni ne odak kamachielo. Chuny Lazaro ne ok odhi e polo. Wang’eyo mano nikech kane Yesu ochiero Lazaro, Lazaro ne ok nie polo kodak e ngima maber but Nyasaye. To kare Lazaro ne ni kanye kuom ndalo ang’wen-go te? Ne en mana e bur ka onindo.—Eklesiastes 9:5, 10.

 Par ni Yesu ne owacho ni tho chalo gi nindo kendo chiero ng’at motho chalo gi chiewo ng’at monindo. Muma wacho kama: “‘Osiepwa Lazaro nindo; to an adhi mondo achiewe.’ Eka jopuonjrene nowachone ni, ‘Ruoth, ka onindo, obiro kwo.’ To Yesu nowacho kuom thone; gin to ne gigalo ni nowacho mana nindo mar yueyo. Eka Yesu nowachonigi ratiro ni, ‘Lazaro otho.’” (Johana 11:11-14) Kuom chiero Lazaro, Yesu nomiyo Lazaro obedo mangima kendo, mi oriwore gi joodgi. To mano kaka Yesu nomiyo joodno obedo mamor sidang’!

Chier ma ne Yesu otimo e yor hono kinde ma ne en e piny, ne nyiso mana e okang’ matin gima ne odhi timo kolocho kaka Ruodh Pinyruodh Nyasaye. * Kinde mobiro locho e piny, Yesu biro chiero ji duto ma nindo e liete. Mano e momiyo nowacho niya: “An e chier.” Parie kaka ibiro mor neno ka ochier osiepeni kod wedeni! Bende, parie kaka joma ochier biro bedo mamor!—Luka 8:56.

Yesu nonyiso Maritha niya: “Ng’a ma yie kuoma, kata otho nodok mangima; kendo ng’at mangima, koyie kuoma, ok notho nyaka chieng’.” (Johana 11:25, 26) Jogo ma Yesu biro chiero e kinde mar lochne mar higni gana achiel, biro yudo thuolo mar dak nyaka chieng’, to mana ka giketo yie madier kuom Yesu.

Bang’ wacho wechego e wi chier, Yesu nopenjo Maritha niya: “Iyie ma?” Maritha nodwoke niya, “Ee, Ruoth, aseyie ni in e Kristo, Wuod Nyasaye.” (Johana 11:26, 27) To nade in? Be diher bedo gi geno motegno kuom chier mana kaka Maritha? Ka en kamano, gima inyalo timo mokwongo en puonjruok e wi gimomiyo Nyasaye nochweyo dhano. (Johana 17:3; 1 Timotheo 2:4) Ng’eyo ma kamano nyalo tego yie mari. Donge nyalo bedo gima ber kipenjo achiel kuom Joneno mag Jehova mondo onyisi gima Muma puonjo kuom wachni? Gibiro bedo mamor ahinya wuoyo kodi e wi geno majaber mar chier.