Ne onyuola Bilbao, e piny Spain. Ne an nyathi mar ariyo e kind nyithindo ang’wen. Joodwa ne gin Jo-Katholik kendo ne ajadhi e Misa maok abara. Ka nachopo jahigni 23, ne abedo japuonj—tich ma ne ahero kendo ma ne atimo kuom higni 40. Achiel kuom gik ma ne amor puonjo e skul ne en dind Jo-Katholik, e wi mano seche mag odhiambo ne apuonjo katkaisim—kapuonjo nyiri oikre chamo sakramit.

Bang’ dak maber gi chwora kuom higni 12, notho moweya gi nyithindo ang’wen ma nyiri. Kinde ma chwora nothoeno ne an mana gi higni 33! Ne amanyo hoch kuom puonj mag Jo-Katholik to pod penjo mang’eny ne chanda. Moko kuom penjo ma ne chandago ne gin: ‘Ang’o momiyo dhano tho ka Kristo nowarowa? Ka joma beyo dhi e polo, ang’o momiyo wakwayo mondo Pinyruodh Nyasaye obi?’ Gima ne chanda moloyo ne en ni ‘Ka en adier ni Nyasaye ng’adonwa bura sama watho, ere tiende mondo dhano owuog bang’e e polo, e purgatori, kata e mach mak tho mondo ong’adnegi bura mogik?’

Mago e penjo ma ne apenjo padri moko. Achiel kuomgi ne odwoka niya: “An akiya, penj bisop. To mano obadhie ang’o? Donge in ng’ama oyie kuom Nyasaye? Mano owe chandi!” Kata kamano, pod ne amanyo dwoko mag penjogo. Bang’e, ne adhi mondo awinj puonj mag Jo-Pentekost, puonj mag Jo-Katholik miluongo ni Jesuits, kod mag Gnostics. To ema ne pod onge ng’ato ang’ata kuomgi ma ne nyalo dwoko penjonago.

Kane an gi higni 60 gi dire, nyathi moro ma jahigni abiriyo norwaka mondo adhi e chokruok mar Joneno mag Jehova. Ne amor gi gik ma ne aneno kendo ma ne awinjo, to nikech ngimana nodich, ne ok atudora kendo gi Joneno e kindego. Bang’ higni ariyo, Joneno moko ariyo ma ne okendore miluongo ni Juan gi Maite nobiro lima. Kuom dweche adek, ne apenjogi penjo turi ka gin to gidwoka adwoka mi gikone ne wabedo gi chenro mar puonjruok Muma.

 Mano kaka ne puonjruogego ne mora! Ne anono gimoro amora adimba ka atiyo gi loko adek mag Muma mondo abed gadier ni Joneno mag Jehova ne puonjo gik madier. Ne afwenyo ni kare nosewuonda kuom higni pieche. Ne awuoro kaka gik ma ne ayie kuomgi ne opogore ahinya gi gik ma ne apuonjora e Muma. Golo puonj Katholik e chunya ne tekna ahinya; ne chalo mana ka pudho osiki mogurore matek e lowo.

Dichwo ma ne oduogo okenda ne obedo matuwo motho. E kindego bende ema ne aritayae ma adar Bilbao kuom kinde. Juan kod Maite bende ne odar. Gima rach en ni ne aweyo puonjora Muma. Kata kamano, e chunya ne ang’eyo ni adiera ma ne oyudo asepuonjora ne gin mwandu malich. Wiya ne ok owil kodgi.

Bang’ higni 20 kama, ka koro ne an gi higni 82, Juan gi Maite noduogo Bilbao kendo ne gilima. To mano kaka ne amor nenogi kendo! Ne afwenyo ni kare wi Jehova ne ok owil koda, omiyo ne achako puonjora Muma kendo. Juan gi Maite ne tera mos, nimar kinde mang’eny ne anyalo penjogi penjo achiel nyadinwoya. Ne dwarore ni onwona puonj mowuok e Muma nyading’eny mondo okonya weyo puonj ma noyudo asemakorago kuom higni. Bende, ne agombo ng’eyo kaka daler ne wedena kod osiepena adiera ma ne asepuonjora e Muma.

Ne obatisa ka an gi higni 87, kendo chieng’ ma ne obatisaeno e odiechieng’ ma ne amorie mogik e ngimana. Ne obatisa e chokruok moro maduong’ mar Joneno mag Jehova. Jaduong’ kanyakla moro ma Jakristo ne ogolo twak ma ne oik ne joma ne idhi batisi chieng’no. Twagno ne omiyo pi wang’a ochwer. Ne awinjo twagno mana ka gima an ema Jehova ne wuoyo koda achiel kachiel. Bang’ wuok e pi ni i, ji mang’eny ne obiro mosa kata obedo ni thothgi ne gin joma ne pok aromogo nyaka nene!

Ne asebet ka ang’eyo ni Yesu Kristo “e yo.” (Johana 14:6) Kata kamano, puonjruok Muma nokonya ng’eyo Jehova, ma ema Yesu terowa ire. Sani koro anyalo wuoyo gi Nyasaye mana kaka dawuo gi wuonwa kata osiepna. Somo buk miluongo ni Mkaribie Yehova * noloko ngimana. Ne asome te mana gi otieno achiel! Gima ne omora e bugno en neno kaka Jehova kecho ji.

Ka aparo kaka asemanyo adiera kuom kinde malach, weche Yesugi ema biro e pacha: “Kwauru, eka nomiu; dwaruru, eka ununwang’; dwong’uru, eka noyawnu.” (Mathayo 7:7) To nikech koro aseng’eyo dwoko mag penjo ma ne chanda ahinyaka, amor puonjo jomoko adierago.

Kata obedo ni sani an jahigni 90, e weche Nyasaye to pod atin. Chokruok moro amora ma adhiye e Od Romo en thuolo makende nimar kuno ema amedo puonjorae weche momedore kendo bedo gi owete gi nyimine. Ageno bedo japuonj kendo e piny molos obedo Paradis. (Fweny 21:3, 4) Gima agombo ahinya en neno osiepena mosenindo e tho kendo puonjogi adiera mowuok e Muma. (Tich Joote 24:15) Mano kaka agombo nyisogi mich ma jaber ma Jehova nomiya e tina!