Nonyuola e boma maduong’ mar piny Latvia miluongo ni Riga. Ne wan nyithindo ariyo; nyako gi wuowi kendo minwa ema nopidhowa. Kata obedo ni minwa ne en Ja-Katholik, ne wajodhi e kanisa mana ka dichiel e odiechienge mag nyasi. A e tinna, ne asebedo ka ang’eyo ni Nyasaye nitie. Kata kamano, kane an rawera, ne achako luwora gi weche mang’eny ma ne okawo pacha.

Kinde ma ne an nyathi, minwa nofwenyo ni ne ahero gonyo kata wuoyo gik moko kae to aduokogi kendo. Nikech ne nitie gik mang’eny e odwa ma ne inyalo wuo, minwa ne luor weya kenda e ot. Omiyo, nonyiewona gir tugo moro molos gi chuma ma ng’ato ne riwo owuon. Ne ahero ahinya riwo gino kae to achako awuoye. Gimachielo ma be ne ahero ahinya, ne en riembo pikipiki. Mano nomiyo minwa ochulona ma adonjo e piem mag pikipiki ma ne iluongo ni Zelta Mopēds (pikipiki machalo ndiga). Ne achako piem gi pikipikigo kae to bang’e ne achako piem gi pikipiki ma sie.

Nikech wiya ne yot, mapiyo nono ne abedo jariembo ma nigi huma kata obedo ni piemgo ne nyalo miyo ng’ato ohinyre marach. Ne akawo okombe nyadidek e piem madongo mag pikipiki ma ne itimo e piny Latvia, to okombe mar Baltic States Superbike Championship ne ayudo nyadiriyo.

Ka nochopo kama koro humba ne lach ahinya, nyako moro ma ne osiepna ma ne iluongo ni Evija (ma bang’e noduogo obedo chiega) noromo gi Joneno mag Jehova. Evija noyudo buge mag Joneno ma ne nigi kama ng’ato nyalo kwayogo mondo opuonje Muma. Nopong’e moore. Matin bang’e, Joneno ariyo nolime mochako puonje Muma. Ne ok ane gima rach gi  mano. Kata kamano, an to ne ok adich gi weche Nyasaye gie kindeno.

Bang’e, Jonenogo nogwela mondo an be ariwra kodgi sama gipuonjore gi Evija. Ne ayie timo kamano, kendo ne amor gi weche ma ne gipuonjo. Achiel kuom gik ma ne omora ng’eyo ahinya ne en singo manie Muma ni piny chieng’ nobed paradis. Kuom ranyisi, nosomna bug Zaburi 37:10, 11, ma wacho niya: “Nimar podi kinde matin, kendo ng’a marach obiro onge: Ee, iniket chunyi kuom paro kar bet mare, kendo obiro onge. To jo mamuol ginicham piny; kendo ginimor moloyo kuom kwe mang’eny.” Singono nomora sidang’!

Gombo ma ne an-go mar ng’eyo Nyasaye nomedore. Ne afwenyo miriambo mang’eny mag din. Komachielo to ne aneno kaka puonj mag Muma to ochomo yo kendo winjore maler.

Kaka ne amedo puonjora Muma, ne apuonjora ni Jehova neno ngima kaka gima duong’ ahinya. (Zaburi 36:9) Mano nomiyo achako neno piem mag pikipiki e yo mopogore. Ne ok adwar tugo gi ngimana kendo. Kar mano, ne adwaro tiyo gi ngimana e miyo Jehova duong’. Omiyo, huma gi ilo ma piemgo ne kelona ne koro ok lichna.

E higa mar 1996, ne adhi e chokruok maduong’ mar Joneno mag Jehova moriwo pinje ma ne otim e boma mar Tallinn, Estonia, kama ne chiegni gi pap ma ne wajopiemie kwariembo pikipiki. E chokruogno, ne aneno ji moa e pinje mopogore opogore ma luwo puonj achiel kendo obet kanyachiel gi kuwe. Kuom ranyisi, kane kibeti Janeno moro olal, ne aparo ni kibetino olal chuth. Kata kamano, matin nono, Janeno machielo noyudo kibetino moduoke gi gik moko duto e iye. Mano nomako dhoga! Ne aneno gi wang’a ni Joneno luwo chike mag Muma maonge badhruok. Ne wadhi nyime puonjore mi e higa mar 1997, an kaachiel gi Evija nobatiswa mwabedo Joneno mag Jehova.

Moko kuom osiepena osetho mana nikech piem marach mag pikipiki. Puonjruok Muma nokonya ng’eyo ni onego ati ne Jehova, Nyasaye ma e Jachiw ngima. Ng’eyo mano noreso ngimana.

Kuom higni ang’wen moko, an kaachiel gi Evija ne watiyo e ofis mar Joneno mag Jehova man Riga. Gie sani, wamor pidho nyarwa miluongo ni Alise kendo konye mondo en be oher Jehova. Bende, odiechieng’ achiel e juma, iluongaga e ofis Jonenono mondo alos mtokni mokethore kod gik mamoko. Amor ahinya ni pod anyalo tiyo gi lony ma ne ayudo kane an nyathi! Ee, nyaka sani, pod awuoyo awuoya gik moko kendo aduokogi.

Amor ahinya puonjo jomoko e wi Nyasaye madier ka an gi jooda, to mano en mana nikech ne apuonjora Muma. Kuom adier, singo manie Muma ni piny chieng’ nobed paradis noloko ngimana!