WACH MADUONG’ MA GASET WUOYOE
Thoth Gik ma Ji Osekoro Osebare, Manok e ma Osetimore
Be diher ng’eyo gik ma biro timore e ngimani kinde mabiro? Ji mang’eny gombo ng’eyo gik ma biro timorenegi, kendo ji mang’eny koro weche ma biro timore. Kata kamano, kinde moko gik ma gikorogo timore to kinde moko ok gitimre. Ne ane weche maluwogi:
JOSAYANS jotiyo gi masinde ma korgi tek kod pesa mang’eny mondo gitem ng’eyo gik ma biro timore kinde ma biro. Kuom ranyisi, gitemo nono kaka chido alwora biro ketho piny, kata ng’eyo kabe koth biro chwe e alworau kiny kata ooyo.
JOMA OLONY E TIMO NONRO nyalo wacho kaka ohala kod siasa biro bet e kinde ma biro. Warren Buffett ma en achiel kuom joma omewie moloyo e piny ngima ipako ni en ng’ama otelo ne ji e rieko nikech ohala mage ma siko dhi maber. Jal machielo miluongo ni Nate Silver osetiyo gi kwan mosenon mondo ong’e chiegni gimoro amora ma biro timore kinde ma biro, bed ni en siasa mar piny Amerka kata joma biro loyo mich e sinembe mag Hollywood.
WECHE MA NONDIK CHON ikawo kaka weche mokor. Jomoko neno ni weche ma Michel de Notredame (Nostradamus) nowuoyoe awiye awiye e higni mag 1500 timore e kindegi. Jomoko bende nowacho ni piny ne dhi rumo tarik mogik e kalenda mar Jo-Maya ma ne en Desemba 21, 2012.
JOTEND DINDE kinde moko koro ni masiche biro timore e piny mondo gisiemgo ji kendo giyudgo joma luwogi. Achiel kuom jonabi ma lando ni piny dhi rumo miluongo ni Harold Camping kaachiel gi jolupne ne olando ahinya ni ne idhi keth piny e higa mar 2011. Kata kamano, piny ne ok okethore, pod piny nitie.
JOMA KAWORE NI GIN GI NYALO MAKENDE wacho ni ginyalo koro gik ma biro timore kinde mabiro. Edgar Cayce kod Jeane Dixon nowacho weche moko ma notimore gadier e higni mag 1900. Kata kamano, nitie weche mang’eny ma ne gikoro to ne ok otimore. Kuom ranyisi, Dixon nokoro ni Lweny mar Piny mar Adek ne dhi timore e higa mar 1958, to Cayce nokoro ni dala mar New York ne dhi nyumore e nam e higni mag 1970.
Be nitie yo moro amora mar ng’eyo gadier gik ma notimre kinde mabiro? Mano en penjo maber ahinya. Ka inyalo ng’eyo gik ma notimre kinde mabiro, donge mano biro chiko yiero ma itimo e ngimani?
