E higni mokwongo mag ngimana, joodwa nodak machiegni gi kama iluongo ni Leipzig, e piny East Germany, to kanyo ne ok bor gi tong’ mag piny Czech kod Poland. Ka ne an jahigni auchiel, joodwa nodar odhi Brazil kae to bang’e ne wadhi Ecuador nikech wuonwa ne tiyo e pinjego.

Ka ne an jahigni 14, ne otera e skul moro mar boding’ e piny Germany. Nikech jonyuolna ne odak mabor e piny South America, ne ochuna ni adag kenda. Ne achako bedo ng’ama ogenore awuon. Ne ok adewo kaka timbena mulo jomoko.

Ka ne ajahigni 17, jonyuolna noduogo Germany. Mokwongo ne adak kodgi. Kata kamano, nikech ne an ng’ama jasunga kendo mogenore owuon, ne ok anyal dak kodgi. Omiyo, ka ne an jahigni 18, ne awuok pacho.

Chunya ne chandore sidang’ nikech ne amanyo yo maberie moloyo ma ne anyalo tiyogo gi ngimana. Bang’ nono kit ngima kod riwruoge mopogore opogore, ne aduogo afwenyo ni yo ma berie moloyo ma anyalo tiyogo gi ngimana ne en bayo e piny ma jaberni ka pok dhano okethe.

Ne awuok Germany, kae to ang’iewo piki piki ma adhigo Africa. Mapiyo bang’e, ne ochuna dok Europe mondo adhi alos piki pikino. Kinyne, ne achopo e dho wath moro e piny Portugal. Ne awera gi wach piki piki, kae to achako dhi e wuodhena gi yie.

Ne ariwora gi grup moro mar rowere ma ne dwa ng’ado nam miluongo ni Atlantic Ocean. Kanyo e ma ne aromoe gi Laurie ma bang’e ne obedo jaoda. Mokwongo, ne wakwang’ gi yie nyaka e chula mag Caribbean. Kae to, bang’ dak matin e piny Puerto Rico, ne wadok Europe. An gi Laurie ne wageno ni wanyalo yudo yie moro ma ne wanyalo loko mondo obed yie mar injin mwanyalo dakie. Kata kamano, bang’ menyo kuom dweche adek, wach moro ne ochocho chenrowano apoya nono. Ne ondika bedo jalweny mar piny Germany.

Ne atieko dweche 15 ka an jalweny ma kedo e nam e piny Germany. E kindeno, ne wakendore gi Laurie, kendo ne wachano  mar dhi nyime gi ngima mar bayo. Kinde machuok ka ne pok achako bedo jalweny, noyudo ka waseng’iewo yie moro. Kinde ma ne pod atiyo e lweny, ne walose mos mos mondo obed yie matin mikwang’o. Ne wachano mar dak e yieno ka wabayo e piny ma jaberni. Bang’ ka ne asetieko kinde ma ne dwarore ni ati tij lweny kendo ka ne pod wadhi nyime loso yie, ema ne waromo gi Joneno mag Jehova kendo chako puonjore kodgi Muma.

Mokwongo, ne ok ane gimomiyo onego atim lokruok e ngimana. Ne aseriwo kend gi dhako ma ne oyudo adakgo, kendo ne aseweyo madho ndawa. (Jo Efeso 5:5) Ne aparo ni ne en gima ber chiwo ngimawa mondo waba e piny ka warango chuech mabeyo kendo miwuoro mag Nyasaye.

Kata kamano, ne dwarore ni atim lokruoge moko, to moloyo kuom kido ma ne an-go. Nikech ne an ng’at ma sungore kendo mogenore owuon, ne adich mana gi lony ma ne an-go kod gik ma ne anyalo timo. Ne adich mana gi ngimana awuon.

Chieng’ moro, ne asomo twak ma Yesu nogolo e got. (Mathayo, sula mag 5-7) Ka ne akwongo some, ne ok awinjo tiend bedo mamor ma Yesu ne wuoyoe. Kuom ranyisi, ne owacho ni joma mor gin jogo ma nigi kech kod riyo. (Mathayo 5:6) Ne awuoro kaka ng’at ma nigi riyo kod kech ne nyalo bedo mamor. Kaka ne amedo puonjora, ne afwenyo ni waduto wan gi riyo kod kech mar ng’eyo wach Nyasaye, kata kamano nyaka wabolre ma wayie ni wan-gi dwaro ma kamano, eka watieke. Mano emomiyo Yesu ne owacho kama: “Mano mor manadi ni joma nigi chan e chunygi.”—Mathayo 5:3.

Bang’ chako puonjruok Muma e piny Germany, an gi Laurie ne wadar wadhi e piny France, kae to bang’e ne wadhi Italy. Kamoro amora ma ne wadhiye, ne wayudo Joneno mag Jehova. Ne amor ahinya gi hera madier kod winjruok ma ne gin-go e kindgi. Ne afwenyo ni adier Joneno mag Jehova gin riwruok mar owete mar piny mangima. (Johana 13:34, 35) Bang’ kinde, an gi Laurie nobatiswa ma wabedo Joneno mag Jehova.

Bang’ batiso, ne adhi nyime timo lokruok kuom kido ma ne an-go. An gi Laurie ne wang’ado mar kwang’ e dho wedhe mag Afrika, kae to wang’ado nam mar Atlantic Ocean kwachomo Amerka. Ka ne wan e chuny nam ji ariyo kende, kolworwa mana gi pi lilo, eka ne afwenyo kaka an ng’at matin ahinya kopima gi Jachuech. Nikech ne an gi thuolo mang’eny kendo ne aonge gi gik mang’eny manyalo timo, ne atiyo gi thuolo mang’eny e somo Muma. Weche ma nomora moloyo ne gin mago ma ne wuoyo e wi ngima Yesu ka ne en e piny. Ne en ng’at makare chuth kendo man gi lony mamalo moloyo, to ne ok oketo pache kuome owuon. Gima duong’ e ngimane ne en timo dwaro mar Wuon mare me polo to ok dwache owuon.

Kaka ne amedo paro matut kuom ranyisi mar Yesu, ne afwenyo gimomiyo ne dwarore ni aket Pinyruodh Nyasaye motelo e ngimana, kar mondo gik mamoko ma ne adwaro timo ema obed motelo. (Mathayo 6:33) Ka ne watundo Amerka, ne wang’ado mar weyo wach bayo mondo wadag kanyo ka waketo pachwa koro kuom tiyo ne Nyasaye.

Chon ka ne pod agenora awuon, ne an gi kiawa mang’eny kuom yiero ma ne atimo. Kata kamano, sani koro aseyudo rieko makare ma nyalo taya. (Isaiah 48:17, 18) Bende, aseyudo yo maberie moloyo ma anyalo tiyogo gi ngimana, ma en lamo Nyasaye kod konyo ji mondo ong’eye.

Tiyo gi puonj manie Muma osekonyowa tego kend marwa. Bende, oseguedhwa gi nyathi ma nyako ma koro sani ong’eyo Jehova kendo ohere.

Mano ok nyis ni ngima osebedonwa mayot kinde duto. Kata kamano, kokalo kuom kony ma wayudo kuom Jehova, waseng’ado ni ok wabi weyo tiyone kata geno kuome.—Ngeche 3:5, 6.