WACH MADUONG’ MA GASET WUOYOE | KAKA INYALO BEDO OSIEP NYASAYE
Yor Ngima Maberie Moloyo
Inyalo timo ang’o mondo ibed gi winjruok machiegni gi Nyasaye? Wasenono okenge maluwogi monego ikaw mondo ibed gi winjruok machiegni gi Nyasaye:
-
Ng’e nying Nyasaye, ma en Jehova kendo itigo.
-
Wuo gi Nyasaye pile ka pile kokalo kuom lamo kendo ipuonjri Wachne ma en Muma.
-
Bed gi kinda e timo gik ma moro Jehova.
Sud machiegni gi Nyasaye kuom ng’eyo nyinge, wuoyo kode e lamo, puonjruok Wachne, kendo timo gik ma more
Kaluwore gi weche mokwan-go, be inyalo wacho ni itimo gik ma dwarore mondo ibed gi winjruok machiegni gi Nyasaye? Be nitie kuonde ma ineno ni onego itimie dongruok? En adier ni samoro ok nyal bedoni mayot timo mano, kata kamano, we wanon ane ber ma wayudo ka watimo kamano.
Jennifer ma a e piny Amerka wacho kama: “Kinda moro amora ma ng’ato timo mondo obed gi winjruok machiegni gi Nyasaye ok dhi ka nono. Winjruok ma kamano kelo gueth mang’eny ahinya: wamedo geno Nyasaye, wamedo ng’eyo kido ma en-go, to e wi mago duto, wamedo here. Mano e yor ngima maberie moloyo!”
Kapo ni diher bedo gi winjruok maber gi Nyasaye, Joneno mag Jehova nyalo konyi timo kamano. Ginyalo chano mondo gipuonjre kodi Muma ma onge chudo. Bende gigweli e chokruogegi ma ipuonjruokie Muma e Od Romo man machiegni kodi, kama ibiro morie ahinya bedo kod joma okawo mapek winjruok margi gi Nyasaye. * Ka itimo kamano, ibiro winjo mana kaka jandik zaburi ma ne owacho kama: “Sudo machiegini gi Nyasaye okelona ber.”—Zaburi 73:28.
^ par. 9 Mondo ikwa puonjruok mar Muma kata mondo ing’e kama Od Romo man machiegni kodi nitie, inyalo wuoyo gi ng’at ma ne omiyi gasedni, kata inyalo dhi e Websaitwa mar www.pr418.com/luo, kendo idi kama ondik ni TUDRI KODWA ma yudore gi piny e kama kwongo yawore sama idhi e Websaitwa.
Samoro Inyalo Hero Magi Bende
PENJO MA JI JOPENJO
Ere Kaka Joneno mag Jehova Puonjoga Ji Muma?
E puonjruok Muma ma Joneno mag Jehova tayoga, inyalo tiyo gi Muma moro amora mihero. Bed thuolo gwelo joodu duto kata osiepeni e puonjruok.
