Megan: Oyawre, Shirley. Ne amor ahinya ka ne aneni e Rapar mar tho Yesu ma notim juma mokalo. * Ne ineno nade chokruogno?

Shirley: Chokruogno to ne mit, en mana ni ne ok awinjo tiend weche duto ma ne opuonj ji. Ji mang’eny chamoga Krismas ka giparo odiechieng’ ma nonyuolie Yesu, kod Ista ka giparo chierne, to pok anenoga ka ng’ato ang’ata paro thone.

Megan: En adier ni ji mang’eny timoga nyasi mar Krismas kod Ista e piny mangima. Kata kamano, Joneno mag Jehova to neno ni dwarore ahinya ni wapar tho mar Yesu. Miyae dakika matin mondo anyisie gimomiyo Joneno paro tho mar Yesu.

Shirley: Onge wach.

Megan: Gimaduong’ momiyo Joneno mag Jehova timoga sawo mar paro tho Yesu en nikech en owuon e ma nochiko jolupne mondo otim kamano. Par ane gik ma notimore e otieno mogik kapok ne Yesu otho. Be isewinjo e wi gago moro makende ma Yesu nobedogo gi jolupne ma nomakore kode motegno?

Shirley: Iwuoyo kuom Sawo mar Ruoth?

Megan: Ee, kamano. Sawono bende iluongo ni Chiemo Modhiambo mar Ruodhwa. E odhiambono, Yesu nonyiso jolupne kaka onego gitime. Som ane weche ma Yesu nowachogo e bug Luka 22:19.

Shirley: Ndikono wacho kama. “Bende, nokawo makate mogoyo erokamano, kendo nong’ingo, mi nomiyogi, kowacho kama: ‘Mani ochung’ ne ringra ma idhi chiw nikech un. Sikuru ka utimo ma mondo uparago.’”

Megan: Erokamano kuom somo maber. Ne ane gima Yesu nochikogi ni gitim e weche mogik e wesno: “Sikuru ka utimo ma mondo uparago.” Kapok nochiko jolupne mondo gidhi nyime pare, Yesu nonyisogi gima nonego gisik ka giparo kuome. Nowacho ni ne odhi chiwo ngimane ne jolupne. Yesu nowacho weche ma dwaro chalo gi ma yudore e Mathayo 20:28. Ndikono wacho kama: “Wuod dhano nobiro, ok ni mondo ji otine, to mondo oti ne ji kendo mondo ochiw ngimane obed rawar ne ji mang’eny.” E yo machuok, mano e gimomiyo higa ka higa Joneno mag Jehova chokorega mondo gipar tho mar Yesu, tiende ni giparo misango ma Yesu nochiwo mondo owargo dhano. Thone e ma nyalo miyo dhano ma winjo Nyasaye oyud ngima mochwere.

Shirley: Asewinjo ka ji wacho ni Yesu notho mondo wayud ngima. Kata kamano, adiera en ni wachno to pok nodonjonaga.

 Megan: Shirley, nitie ji mang’eny ma bende ok winjga tiend wachno maler. Wach misango ma Yesu nochiwo mondo owarwa ok en puonj ma ng’ato nyalo winjo tiende mayot. Kata kamano, en achiel kuom puonj mabeyo ma yudore e Wach Nyasaye. Be inyalo meda dakika moko matin?

Shirley: Ee, anyalo medi.

Megan: Erokamono. Aa mana somo weche moko e wi misango ma Yesu ne ochiwo mondo owar dhano, abiro temo leronigi e yot mayot.

Shirley: Erokamano.

Megan: Mondo wawinj tiend wachni, nyak wakwong wang’e chandruok ma Adam gi Hawa nokelo ne dhano duto, ka ne gitimo richo e puodho mar Eden. We wasom ane wachno e Jo-Rumi 6:23. Donge inyalo some?

Shirley: Anyalo some. Owacho kama: “Misach richo en tho, to mich ma Nyasaye chiwo en ngima ma nyaka chieng’ kokalo kuom Kristo Yesu Ruodhwa.”

Megan: Erokamano. Wanon ane wechego. Mokwongo, ndikono chako kowacho niya: “Misach richo en tho.” Ma en chik ma Nyasaye ne okwongo miyo dhano bang’ chueyogi. Ne onge jaricho ka ne Nyasaye ochueyo gik moko duto. Nyasaye ne ochueyo Adam gi Hawa ka gionge gi richo, kendo ne gidhi nyuol nyithindo ma onge richo. Omiyo, onge ng’ato ang’ata ma ne dhi tho. Adam gi Hawa kaachiel gi nyithindgi ne dhi dak nyaka chieng’ e ngima maber. Kata kamano weche ne okethore, koso?

Shirley: Ee. Adam gi Hawa ne ochamo olemo ma Nyasaye nokwerogi.

Megan: Iwacho kare. Ka ne Adam gi Hawa oketho chik ma Nyasaye nomiyogi, ne gitimo richo. Kuom mano, ne giyiero giwegi bedo joricho. Yiero ma ne gitimono ne dhi kelonegi chandruoge kaachiel gi nyithindgi duto.

Shirley: Ang’o mitemo wacho?

Megan: We ati ane gi ranyisi moro kae. We apenjie, be ing’eyo kaka iloso matafari?

Shirley: Ee! Ang’eyo maber.

Megan: Wawach ni bao ma itiyogo e loso matafari nigi mbala moro. Matafari duto ma iloso e baono biro chalo nade? Donge matafarigo duto biro bedo gi mbala kuomgi, koso?

Shirley: Ee.

Megan: E yo machalo kamano, ka ne Adam gi Hawa oketho chik Nyasaye, ne gibedo gi mbala mar richo. To nikech ne gibedo joricho ka pok ne ginyuolo nyathi moro amora, nyithindgi duto ne dhi yudo mbala mar richo. Ne idhi nyuol nyithindgi ka gin gi richo. E Muma, wach motigo ni “richo” ok en mana ketho ma ng’ato otimo, to bende en gima wayudo koa kuom jonyuolwa. Ka ne Adam gi Hawa otimo richo ne pok ginyuol. Omiyo, kata obedo ni onge ketho moro amora ma nyithindgi notimo, ne girwakogi giduto e richo kendo gikone ne gidhi tho, mana kaka waa somo e Jo-Rumi 6:23, ni misach richo en tho.

Shirley: Mano ok en gima kare. Ere kaka dhano duto nyalo chandore mana nikech richo mar Adam gi Hawa kende?

Megan: Mano penjo maber ahinya nikech gin e ma ne gitimo richo to ok wan. Mano e momiyo Nyasaye notiyo gi chikene ma kare e ng’ado ne Adam gi Hawa buch tho nikech richogi, to nyithindgi nomiyo geno moro ma jaber. Nyasaye noloso chenro mar golowa e tuech mar richo kod tho. To mano e momiyo Yesu nothonwa. Wasom ane kendo Jo-Rumi 6:23. Bang’ wacho ni “misach richo en tho,” ndikono dhi nyime wacho niya: “To mich ma Nyasaye chiwo en ngima ma nyaka chieng’ kokalo kuom Kristo Yesu Ruodhwa.” Kuom mano, tho mar Yesu kende e ma golowa e tuech mar richo kod tho. *

Megan: Nitie gimachielo e ndikoni ma daher ni wanon kanyachiel.

Shirley: En ang’o?

Megan: Ne ane ni ndikono wacho kama: “Mich ma Nyasaye chiwo en ngima ma nyaka chieng’ kokalo kuom Kristo Yesu Ruodhwa.” Koro ka Yesu e ma nochandore mothonwa, kochiwo ngimane nikech wan, ang’o momiyo ndikono wacho ni tho mar Yesu en “mich ma Nyasaye chiwo”? Ang’o momiyo ok owach ni “mich ma Yesu chiwo”? *

Shirley: Ok ang’eyo.

Megan: Nyasaye e ma nochueyo Adam gi Hawa, kendo en e ma ne gikethone e puodho mar Eden. Nyaka bed ni nowinjo malit ahinya kane nyithinde ariyogo ong’anjone. Kata kamano, mapiyo nono Jehova nowuoyo e wi gima nodhi timo e kelo warruok. * Dwache ne en ni achiel kuom joma ne ochueyo manie polo obi e pinyka, odag kaka dhano ma onge richo, kae to ochiw ngimane kaka misango. Omiyo, misango ma ne ochiw ne en mich moa kuom Nyasaye. Nitie yo moro machielo ma misangono bende nobedo mich moa kuom Nyasaye. Be isegapora kaka nyaka bed ni Nyasaye ne owinjo ka ne oneg Yesu?

Shirley: Ooyo, pok aparoga wachno.

Megan: Aneno gik tugo mag nyithindo e laro kae. Nyaka bed ni in-gi nyithindo.

Shirley: Ee, an gi nyithindo ariyo, ma wuowi kod ma nyako.

Megan: Nikech in gi nyithindo, tem ane paro kaka Jehova Nyasaye ma e Wuon Yesu ne owinjo chieng’ ma ne Yesu othoe. Iparo ni Nyasaye ne owinjo nade ka omak Wuode mohero, mojare, kendo ogoye adhong’? To Wuon-gi nowinjo nade sama ne oneno ka iguro Wuode e yath kendo oweye kanyo mondo otho mos mos, tho malit?

Shirley: Nyaka bed ni ne owinjo malit ahinya. Pok naparo wachno e yo ma kamano!

Megan: En adier ni ok wanyal ng’eyo maber kaka Nyasaye ne owinjo chieng’no. Kata kamano, wang’eyo ni onyalo winjo lit kaluwore gi gima rach motimore, kendo wang’eyo gimomiyo ne oweyo mago duto otimre. Ileronwa wachno maber e ndiko mar Johana 3:16, ma en ndiko ma ji mang’eny ong’eyo. Inyalo somo ndikono?

Shirley: Ee. Owacho kama: “Nimar Nyasaye nohero piny ahinya mi nochiwo Wuode ma miderma, mondo ng’ato ang’ata ma nyiso yie kuome kik keth, to obed gi ngima ma nyaka chieng’.”

Megan: Erokamano kuom somo. Ne ane kendo weche ma ndikono chakogo. Owacho kama: “Nyasaye nohero piny.” Hera e ma ne en wach maduong’. Hera e ma ne omiyo Nyasaye ooro Wuode e piny mondo othonwa. Kuom adier, tho mar Yesu e yo maduong’ie moloyo ma Nyasaye ne onyisowago herane. To mano e momiyo Joneno mag Jehova chokorega higa ka higa mondo gipar tho mar Yesu. Be iseyudo dwoko mar penjo ma ne ipenjocha?

Shirley: Ee, aseyudo. Erokamano kuom kawo thuoloni mondo ikonya winjo wachno.