Ne apon e taon moro matin miluongo ni Ancram manie dala mar New York e piny Amerka. Ng’eny joma ne odak e taondno ne gin jopith dhok. Parie ni dhok ne ng’eny e taondno moloyo dhano.

Ne nitie kanisa achiel e taondno duto, to mano e ma joodwa ne dhiye. Jumapil ka Jumapil okinyi, kwarwa ne jagona wuoche range, kae to ne adhi e kanisa kating’o Mumba matin ma rachar ma dawa ne omiya. An kaachiel gi nyithiwa matindo ariyo ne opuonjwa tiyo matek, konyo jomoko, miyogi luor, kendo goyo ne Nyasaye erokamano kuom gik momiyowa.

Ka ne an ng’at maduong’, ne adar odwa kendo ne abedo japuonj. Ne an gi penjo mang’eny e wi Nyasaye kod ngima. Moko kuom nyithindo ma ne apuonjo ne nigi nyalo moko makende. Moko to ne onge gi nyalo makendego, kata kamano ne gitemo matek. Nyithindo moko nong’ol, moko to dendgi ne ber ahinya. Wachno ne chanda ahinya nikech naneno ni nitie jomoko ma obuon. Jonyuol nyithindo ma ne onge gi nyalo makende kata ma ne nyithindgi ong’ol ne jowacho ni, “Mano en dwaro mar Nyasaye.” Ne awuoro gimomiyo Nyasaye ne nyalo weyo mondo onyuol nyithindo moko ka ging’ol. Ne awuoro gima omomiyo ne en kamano to onge ketho moro ma nyithindogo ne otimo.

Bende, ne ajapenjora kama: ‘En ang’o maduong’ monego atim gi ngimana?’ Ne aneno ni ngima ne chuok ahinya. Ne apon e ot maber, ne asomo e skunde mabeyo, kendo sani atimo tich ma ahero ahinya. Kata kamano, pod ne awinjo ka aremo gimoro. Moko kuom gik ma ne ageno timo e ngima ne gin, donjo e kend, bedo gi ot maber gi nyithindo, dhi nyime gi tich nyaka aritaya, kae to bang’ mano adhi adak kuonde miritoe joma oti. Ne awuoro kabe nitie gimoro machielo ma ne anyalo timo e ngimana.

Kinde moro, ne wadhi bayo kod jopuonj wetena moko e pinje mag Ulaya. Ne wadhi e kanise miluongo ni Westminster Abbey, Notre-Dame de Paris, kod Vatican, kaachiel gi kanise mamoko ma tindo tindo. Kamoro amora ma ne adhiye ne amanyo dwoko mag penjo ma  ne chanda. Ka ne adok thurwa Sloatsburg, e dala mar New York, ne adhi e kanise mang’eny. Onge kata achiel ma ne omiya dwoko mowinjore.

Chieng’ moro, nyako ma jahigni 12 ma ne somo e skul ma napuonjoe ne obiro ira mopenja penjo adek. Mokwongo, ne openja kabe ang’eyo ni en Janeno mar Jehova. Nadwoke ni nang’eyo. Mar ariyo, ne openja kabe daher ng’eyo weche momedore e wi Joneno mag Jehova. Nadwoke ni daher ng’eyogi. Mar adek, ne openja kama adakie. Ka ne anyise kama adakie, ne wafwenyo ni kare ne wan jirende. Penjo adek ma nyakono ne openja e ma ne dhi kelo lokruok e ngimana chuth.

Mapiyo bang’ mano, ne oriembo ndike nyaka e oda mochako puonja Muma. Ne apenje penjo ma ne asebedo kapenjo jotend din mang’eny. Mopogre kodgi, en to nodwoko penjoga kotiyo gi Mumba. Ne omiya dwoko ma ne pok awinjo kamoro amora!

Gik ma ne apuonjora e Muma nomora ahinya kendo konya ng’eyo dwoko mag penjo ma ne chanda. Weche ma ne asomo e 1 Johana 5:19, nojiwa ahinya, bugno wacho kama: “To piny duto ni e bwo teko mar Ng’at Marach.” Chunya ne okuwe ka ne apuonjora ni Satan e ma kelo chandruoge duto manie piny, kendo ni Nyasaye biro tieko chandruogego duto. (Fweny 21:3, 4) Ne afwenyo ni ng’ato nyalo winjo tiend weche manie Muma e yo maber ka olernego e yo makare. Kata obedo ni Janeno mar Jehova ma ne puonjore koda ne en jahigni 12 kende, ne ajawacho ni adiera en adiera kata bed ni ng’at ma puonji rom nade.

Kata kamano, pod ne adwaro neno ka be Joneno mag Jehova timo gik ma gipuonjo. Kuom ranyisi, nyakono ne ojiwo ni Jokristo madier nyiso kido kaka horuok kod ng’wono. (Jo-Galatia 5:22, 23) Ne ateme mondo ane ka be onyiso kidogo. Chieng’ moro, ne alewo ne puonjruokwa mar Muma, to ne atimo mano ka ang’eyo. Ne apenjora niya: ‘Be pod obiro rita? Kapo ni orita, be iye biro wang’ nikech alewo?’ Ka ne adonjo gi gari e dalana, ne anene ka orita e dhooda. Ne oringo mobiro e mtokana ma owachona niya: “Ne achiegni mana dok ot mondo anyis minwa ni ogoye simo e osiptal kata ne polis openj kapo ni gimoro ne otimoreni, nikech pok ilewoga ne puonjruok. Chunya ne chandore ahinya!”

E kinde moro, ne apenje penjo moro matek ma ne aparo ni jahigni 12 ok nyal dwoko. Ne adwaro neno ka obiro chiwo dwoko moro amora mobiro e wiye. Bang’ penje penjono, nong’iyo wang’a tir kae to onyisa niya: “Mano penjo matek dwoko. We andike piny kae to abiro penjo jonyuolna.” Notimo mana kaka nowachono. E puonjruok marwa ma noluwo mano, nokelona gaset mar Ohinga mar Jarito ma ne nigi dwoko mar penjonano. Mano e momiyo nachako lemo gi Joneno mag Jehova, nikech bugegi ne chiwo dwoko moa e Muma e wi penjo duto ma ne an-go. Ne adhi nyime puonjora Muma gi nyakono, kendo bang’ higa achiel ne obatisa ma abedo Janeno mar Jehova. *

Ka ne aseyudo dwoko duto mag penjoga, ne agombo nyiso jomamoko bende wechego. (Mathayo 12:35) Mokwongo, joodwa ne ok dwar winjo puonj mag Joneno mag Jehova. Kata kamano, bang’ kinde ne giloko paro ma ne gin-go e wi Joneno. Minwa ne otho kinde matin bang’ ka osechako puonjore Muma gi Joneno. Kata obedo ni ne otho kapok nobatise, an gadier ni nodwaro ahinya tiyo ne Jehova.

E higa mar 1978, ne wakendore gi Elias Kazan ma bende ne en Janeno mar Jehova. E higa mar 1981, an kod jaoda ne oluongwa tiyo e Bethel man e piny Amerka. * Gima lit en ni, bang’ ka ne wasetiyo e Bethel mana kuom higni ang’wen, Elias notho. Kata obedo ni ne abedo chi liel, ne adhi nyime tiyo e Bethel ma ne okonya keto pacha kamoro achiel, kendo hoyo chunya ahinya.

E higa mar 2006, ne wakendore gi Richard Eldred ma bende ne tiyo e Bethel. Pod wadhi nyime tiyo kode e Bethel nyaka chil kawuono. Sani koro aseng’eyo adiera e wi Nyasaye, omiyo amor gadier yudo dwoko mag penjo ma nosechando pacha ahinya kendo koro ang’eyo gimomiyo Nyasaye nochueyo dhano. Mago duto ne apuonjora mana nikech penjo adek ma nyako matin-cha nopenja.