Ne adongo e alwora moro ma ji odhierie e taon miluongo ni Montreal. Wuonwa notho ka ne ajadweche auchiel kende, omiyo minwa e ma koro nodong’ gi ting’ mar pidhowa. Ne wan nyithindo aboro e odwa to an ne an chogo.

Ka ne adongo, ne ahero tiyo gi yedhe ma mero ji, tugo tuke mag pesa, kendo osiepena ne gin jonjore. Ka ne ajahigni apar, mon ma ndhaga kod joma joholo jomoko pesa ka gidwaro ohala maduong’ nochako tiyo koda e chokonegi pesgi kuom ji. Ne ahero ahinya wuondo ji mondo amagi pesagi. Mano e kaka nadak.

Ka ne ajahigni 14, koro ne alony e timbe mecho. Kuom ranyisi, ne anyalo nyiewo bangli, sa mag lwedo, kod tere mowir ng’egi gi dhahabu kae to aketonegi kido ma nyiso ni olosgi gi dhahabu, kendo ne ausogi e nderni, kuonde michungoe mtokni, kod kuonde ohelni. Ne ahero timo gik makelona pesa e yo mayot. Nitie chieng’ moro ma ne ayudo dola 10,000 e odiechieng’ achiel kende!

Ne oriemba e skul mar rieyo nyithindo ka ne ajahigni 15, kendo ne aonge gi kama dadhie. Ne ajanindo e nderni, kuonde ma ji joyueyoe, kata e ute osiepena ma ne oyie rwaka.

Kinde mang’eny, polise ne chich koda nikech ohelni ma ne atimogo. To ne ok otweya e jela nikech ne ok aus gik mokwal. Kata kamano, ne ogoya fain ding’eny nikech timbe mag mechogo kaachiel gi uso gik moko to aonge lesen. Nikech ne ok aluoro ng’at ang’ata ne ajachoko pesa ne jogo ma chiwo pesagi gi ohala maduong’. Mano ne en tich marach ahinya, ma seche moko ne chuna ting’o bunde. Nitie kinde ma ne wariwre gi jomamoko mondo watim timbe mahundu.

Ne ahango neno Muma ka ne ajahigni 17. Kindeno noyudo adak gi nyako moro mosiepna, ma ne ochako puonjore Muma gi Joneno mag Jehova. Kata kamano, ne atamora yie gi chike manie Muma, omiyo ne awera kode kendo ne adhi dak gi nyako machielo, ma bende ne en osiepna.

 Ngimana ne olokore ka ne nyako ma ne adhi dakgono bende ochako puonjore Muma gi Joneno mag Jehova. Nyakono ne oloko ngimane, kendo ne amor gi kaka ne ochako bedo ng’at mamuol kendo mahore. Chieng’ moro ne ogwela e chokruok mar Joneno mag Jehova, kendo ne ayie ma adhi. Ka ne achopo, Jonenogo ne orwaka gi mor kendo ne gin joma odimbore ahinya. Pok ne aromo gi joma kitgi beyo kamano! Joodwa ne ok onyisa hera ma kamano ka pod natin. Hera ma Joneno mag Jehova nonyisa ne en gima ne asebedo ka agombo e ngimana. Jonenogo ne okwaya mondo apuonjra kodgi, kendo ne ayie timo kamano.

Nenore ni gik ma ne apuonjora e Muma e ma ne chieng’ moro oreso ngimana. An kaachiel gi jowetena ariyo ne wachano mar dhi kwelo kamoro mondo ayud pesa mar chulo gope ma ne an-go ma ne romo dola 50,000. To mano kaka ne ber ni ne ok atimo kamano! Jowetena ariyogo to ne odhi. Achiel kuomgi ne omak, to machielo ne oneg.

Kaka ne amedo puonjora Muma, ne afwenyo ni nitie lokruoge mang’eny ma ne onego atim e ngimana. Kuom ranyisi, ne apuonjora ni 1 Jo-Korintho 6:10 wacho kama: “Jokuoge, kata joma igi lach, kata jomer, kata joyenyo, kata jomecho, ok noyud pok e Pinyruodh Nyasaye.” Bang’ somo ndikono, ne awinjo malit e chunya ma pi wang’a ochuer kuom ng’eyo ni ne atimo gik maricho ahinya. Ne afwenyo ni nonego alok kit ngimana chuth. (Jo-Rumi 12:2) Ne an ng’at mager kendo ma kwiny, kendo ne ang’eny gi miriambo e ngimana.

Kata kamano, Muma bende ne opuonja ni Jehova en ng’at ma kecho ji kendo weyonegi kethogi. (Isaiah 1:18) Ne alemo gi kinda, ka akwayo Jehova mondo okonya weyo timbena machon. Jehova ne okonya loko kita mosmos. Ne akawo okang’ maduong’ e ngimana ka ne wariwo kend gi osiepna ma nyakocha.

Ne wariwo kend ka ajahigni 24 kendo ne an gi nyithindo adek. Koro ne dwarore ni amany tich ma ok mar mibadhi. Ne ok asomo malong’o kendo ne aonge gi barupe ma anyalo tiyogo e manyo tich. E kindeno bende, ne alemo gi kinda ka akwayo Jehova kony. Kae to ne adhi manyo tich. Ne ahero nyiso joma ne nyalo ndika tich ni adwaro loko kit ngimana kendo tiyo tich moro e yo ma ratiro. Kinde moko, ne ajanyisogi ni apuonjora Muma kendo adwaro bedo ng’at maber. Ji mang’eny ne ok dwar ndika tich. Gikone, ka ne ipenja penjo moko kapok ondika tich, ne alero chandruoge ma ne asekaloe chon, kae to ng’at ma ne penjano ne owachona niya: “Ok ang’eyo gimomiyo chunya tek, to gimoro nyisa ni onego andiki andika tich.” Ne ang’eyo ni mano ne en dwoko mar lamona. Bang’ kinde, an kod jaoda ne obatiswa ma wabedo Joneno mag Jehova.

Angima sani nikech ne atiyo gi puonj manie Muma kendo dak e kit ngima mar Jokristo. Koro an gi jooda ma ahero. Nikech an gadiera ni Jehova oseweyona richoga, an gi chuny maler.

Kuom higni 14 mosekalo, asetiyo ne Nyasaye kuom thuolona duto, ka akonyo jomamoko mondo ong’e gima Muma puonjo, kendo nyocha jaoda bende ochako tiyo ne Nyasaye kuom thuolone duto. Kuom higni 30 mosekalo, asebedo mamor konyo ji jotich wetena 22 mondo gin bende gilam Jehova. Pod adhiga kuonde mitimoe ohala, to ok mondo amechi kaka ne ajatimo chon. Sani ka adhi kuno, awuoyo gi ji e wi yie ma an-go. Adhiga mondo apuonj ji geno ma wan-go mar dak e piny manyien ma jomecho ok nobedie.—Zaburi 37:10, 11.