Ot ma jonyuol oheroree kendo miyore luor, e ot ma nyathi dongoe maber. (Jo-Kolosai 3:14, 19) Jonyuol mabeyo ohero nyithindgi kendo gipwoyogi mana kaka Jehova Nyasaye nopwoyo Wuode.—Som Mathayo 3:17.

Wuonwa manie polo chikoga ite ne jotichne, kendo ong’eyo kaka giwinjo e chunygi. Jonyuol nyalo luwo ranyisine kuom chiko itgi ne nyithindgi. (Jakobo 1:19) Onego ging’e kaka nyithindgi winjo e chunygi, kata kapo ni nyithindogo tiyo gi weche ma ok kare.—Som Kwan 11:11, 15.

Janyuol nigi ting’ mar keto chike ma nyathi onego oluw. (Jo-Efeso 6:1) Inyalo puonjri kuom kaka Nyasaye notimo mano. Nonyiso nyithinde hera kuom ketonegi chike, kendo nyisogi gima ne dhi timore ka giketho chikenego. (Chakruok 3:3) Nyasaye ok chun ji gi chikene, to onyisogi ber ma gidhi yudo kapo ni gitimo gima kare.—Som Isaiah 48:18, 19.

Tem ahinya mondo ikony nyithindi oher Nyasaye. Mano biro konyogi timo yiero maber kata sama gin kendgi. Mana kaka Nyasaye puonjo ji kuom timne, in bende puonj nyithindi mondo oher Nyasaye kokalo kuom timbeni.—Som Rapar mar Chik 6:5-7; Jo-Efeso 4:32; 5:1.