Pong’ mag lwedo ne itiyogo e rego mogo mitedogo makate. Mon kod jotich e ma ne hinyo tiyo gi pong’ mag lwedo, kendo chiegni ni ot ka ot ne nigi pong’ mar lwedo. Dwol ma pong’ ne golo sama irego ne ipimo gi ngima mapile mar joma nodak e kinde machon.—Wuok 11:5; Yeremia 25:10.

Gik Jo-Misri machon nyiso kaka ne irego gi pong’ mar lwedo. Cham ne iketo e kidi moro ma iye okunyore matin. Jarego ne go chonge e nyim pong’, kendo ne orego gi kidi moro matin ma ne omako gi lwetene ariyo. Buk moro wacho ni kidi matin ma ne iregogono ne nyalo bedo kilo 2 kod 4. Kapo ni kidino ne ogogo ng’ato ne onyalo hinyo ng’atno marach kata nege.—Jobura 9:50-54.

Pong’ ne en gima duong’ ahinya e ngima joot nikech ne itiyogo e rego mogo, mano e momiyo Muma ne ochiko ni kik ng’ato okawe kaka gir singo. Chikno ne wacho kama e Rapar mar Chik 24:6: “Ng’ato kik mak pong’ miregee kata mana nyapong’ ka gir singo: mano romore gi mako ngima mar ng’ato ka gir singo.”

Muma wacho ni Yesu nie “kor Wuon mare.” (Johana 1:18) Wachno nyiso winjruok makende ma Yesu nigo gi Nyasaye. Wachno bende nyiso tim moro ma Jo-Yahudi ne nigo sama ne gichiemo e mesa.

E ndalo Yesu, Jo-Yahudi ne jobet kolworo mesa ma ne ichiemoe. Ng’ato ka ng’ato ne siro okumbone ma koracham e koshon moro ma ne olos kolworo mesano. Bet kamano ne miyo ginyalo tiyo gi lwedo ma korachwich e chiemo. Nikech ji duto ma nobet kolworo mesa ne bet kong’iyo kamoro achiel, buk moro wacho ni “mano ne miyo wi ng’ato mobet e nyim nyawad­gi bedo machiegni gi kor ng’at manie toke, kuom mano ne inyalo wach ni ng’at ma nyimeno nobet e kor ng’at manie toke.”

Bedo e kor wuon ot, kata e kor ng’at ma noloso nyasi ne okaw kaka dhialro makende ahinya. Muma wacho ni e sawo mogik mar Pasaka jaote Johana “ma Yesu nohero,” nobet but Yesu. Kuom mano, ne yot mondo Johana ‘oyiengre e kor Yesu,’ ka ne odwaro penjo Yesu penjo moro.—Johana 13:23-25; 21:20.