Miyo miluongo ni Janet ma ae owuo kuome e sula motelo wacho kama: “Matin nono bang’ ka wuonwa nosetho, chwora nonyisa ni osechako osiep gi dhako moro. Mapiyo bang’ mano, nobiro mokawo gigene duto moweya an gi nyithindwa ariyo.” Janet noyudo tich, kata kamano pesa ma ne ichule ne ok rom chulo ot ma ne gidakie. Bende, osekalo e pek mamoko mopogore gi mag yuto. Owacho niya: “Ne an gi parruok mang’eny ahinya nikech ting’ momedore ma koro ne an-go. Ne litna ni koro ok nanyal miyo nyithinda gik ma jonyuol ma moko ne miyo nyithindgi. To pod nyaka sani, chunya chandorega kaparo kaka ji nena gi nyithinda. Dibed ni giwuoro gimomiyo ne ok atimo duto ma anyalo mondo ares kend marwa?”

Lamo kod bedo osiep Nyasaye e ma osekonyo Janet nyagruok gi parruok mang’eny. Janet medo wacho kama: “Parruok medorega seche mag otieno nikech koro piny oling’, kendo ok anyal golo pacha kuom gik ma kelona parruok. Lamo kod somo Muma e ma konyaga nindo. Ndiko ma ahero ahinya en Jo-Filipi 4:6, 7, ma wacho niya: ‘Kik ubed gi parruok e wi gimoro amora, to kuom gik moko duto, kulamo kendo kusayo kaachiel gi goyo erokamano, nyisuru Nyasaye kwayo; eka kuwe mar Nyasaye ma loyo ng’eyo duto biro rito chunyu kod pachu.’ Kinde mang’eny asebedo kalemo gotieno kendo Jehova osehoyo chunya ahinya.”

Yesu nowacho weche ma jiwowa ahinya ka ne owuoyo e wi lamo e twak ma ne ogolo e got. Ne owacho niya: “Wuonu ong’eyo gik muchando kata ka pok ukwaye.” (Mathayo 6:8) Omiyo, dwarore ni wakwaye gik mwachando. Lamo e yo maduong’ie moloyo ma konyowa ‘sudo machiegni gi Nyasaye.’ Ka watimo kamano, to Nyasaye bende ‘nosud irwa.’—Jakobo 4:8.

 Adier, lamo ok miwa mana chuny mokuwe kende sama wanyiso Nyasaye gik ma chandowa. To Jehova ma e ‘jawinj kwayo mar ji,’ oikore konyo jogo ma oketo yiegi kuome. (Zaburi 65:2) Mano e momiyo Yesu nopuonjo jolupne mondo “gilam kinde duto ma ok giwe.” (Luka 18:1) Nyaka wadhi nyime kwayo Nyasaye mondo okonywa kendo otawa, ka wan gadier ni obiro guedhowa nikech yie ma wan-go. Ok onego waket kiawa kabe en gi nyalo mar konyowa, kendo ni ogombo timo kamano. Omiyo, ka ‘walemo kinde duto’ ma ok wariwo gi kiawa, wanyiso ni wan gi yie motegno.—1 Thesalonika 5:17.

Bedo gi yie tiende en ang’o? Yie oriwo ‘ng’eyo’ Nyasaye kaka ng’at mantie adier. (Johana 17:3) Wachako ng’eyo Nyasaye kuom somo pache e Muma. Muma nyisowa ni odewo ng’ato ka ng’ato, kendo oikore konyowa. Kata kamano, yie madier ok en mana ng’eyo weche moko e wi Nyasaye. Yie bende oriwo bedo gi osiep motegno gi Nyasaye. Osiep ma kamano ok bedie mana kuom odiechieng’ achiel. Yiewa “siko ka dongo” kaka wamedo puonjore e wi Nyasaye, ka ‘watimo gik ma more,’ kendo neno kaka okonyowa. (2 Jo-Korintho 10:15; Johana 8:29) Yie ma kamano e ma ne okonyo Janet nyagruok gi parruok.

Janet wacho niya: “Neno kaka Jehova konya pile ka pile osekonya bedo gi yie motegno. Kinde mang’eny ne waromo gi chandruoge ma ne nenore ni ok wanyal loyo. To bang’ lemo ding’eny, Jehova ne yawonwa yo, e yo ma ne ok anyal paro. Sama agoyone erokamano, mano konyaga paro gik moko duto mosetimona. Kinde duto osebedo kokonyowa e sa ma wadwaroe kony, to moloyo sama yore duto odinorenwa. Kendo osekonya yudo osiepe moluoro Nyasaye. Kinde duto giikore konya, kendo giketo ne nyithinda ranyisi maber.” *

“Koro aseng’eyo gimomiyo Jehova wacho e Malaki 2:16 ni ‘asin gi riembo dhako.’ Dichwo kata dhako ma jaode ondhogo nigi lit ahinya. Higni mang’eny osekalo nyaka ne chwora weya, to pod seche moko awinjoga ka an kenda kendo ni an ng’at ma nono. Sama awinjo kamano, amanyoga yore ma anyalo konyogo ng’at machielo, kendo timo kamano konyaga ahinya.” Janet oseyudo kony kuom luwo puonj mar Muma ma jiwowa ni kik wapogre kar kendwa. *—Ngeche 18:1.

Janet medo wacho kama: “Gima duong’ ma osehoyo chunya ahinya en ng’eyo ni Nyasaye en ‘wuon nyithi kiye, gi jang’ad buch mond liete.’ En ok onyal jwang’owa kaka chwora ne otimonwa.” (Zaburi 68:5) Janet ong’eyo ni Nyasaye ok tem ng’ato gi “gik maricho.” Mopogore gi mano, ochiwo rieko “ne ji duto e yo mogundho,” kendo omiyowa “teko mokalo mapile” mondo okonywa nyagore gi parruok.—Jakobo 1:5, 13; 2 Jo-Korintho 4:7.

To nade ka waparore nikech masiche ma timore e alworawa?