Ne onyuola Paddington, London e piny England. Paddington ne en kama ne ji ng’enyie ahinya. Ne adak gi minwa kaachiel gi nyiminena adek madongo. Wuonwa ne jwang’owaga kinde ka kinde nikech nohero madho kong’o.

Ka ne pod atin, minwa ne ne jiwaga ni mondo alem otieno kotieno. Ne an gi Muma moro matin ma noting’o mana Zaburi kende kendo naloso wende ka atiyo gi weche mantie e Zaburino. Kinde moro ka nasomo buga moro, naneno weche moko ma wiya pok owilgo. Bugno nowacho ni, “Ndalo biro ma ngima ok nobedie.” Ne ok anindo otienono kendo ne asiko kaparo gik ma biro timore e kinde mabiro. Ne aparora e chunya ni, ‘Nyaka bed ni nitie ngima moro maber moloyo ma wadakie sanini. Nyaka bed ni nitie gimomiyo Nyasaye ne ochueyo dhano.’ Ne ok adwar tho.

Ne achako bedo gi gombo mar ng’eyo gik motudore gi timbe juok. Ne atemo wuoyo gi joma otho, ne ajalimoga liete ka an gi joskul wetena, kendo ne aneno kodgi sinembe maricho ma bwogo ji. Ne waparo ni neno sinembego ne en gima moro ji, kata kamano, ne gibwogowa ahinya.

Ne achako balo ka an jahigni apar kende. Ne achako madho ndawa to mapiyo piyo ne abedo misumba ndawa. Bang’e, ne achako madho njaga. Ka ne ajahigni 11, ne achako bilo kong’o. Kata obedo ni kong’o ne ok mitna, ne awinjoga maber ka amer. Nahero thum kendo nahero miel. Ne ajadhiga e nyasi mag mer kod disko mag otieno ka thuolo oneno. Ne apondoga gotieno ka adhi kuondego kendo ne aduogoga ka piny chiegni ru. Nikech naolga matek, mano ne miyo abara ne skul. To odiechienge ma ne adhi e skul, ne nyaka amany thuolo mar madho kong’o e ka adhi nyime gi somo.

Narem ahinya e penj ma ne watimo mogik e skul. Minwa ne iye owang’ matek nikech wachno, kata kamano, ne pod okiya timbe maricho ma ne atimo. Ne wadhawo kode ma aringo awuok dala. Ne adhi adak gi osiepna moro ma wuoyi miluongo ni Tony, ma ne en Jarasta. Ne en jamahundu, ne ouso yedhe mamero ji, kendo ne ong’ere kaka ng’at mager  ahinya. Ne amako ich ka ajahigni 16 kae to anyuolo nyathi ma wuoyi.

Ne ahango romo gi Joneno mag Jehova ka ne adak e ute ma ne omi mon ma onge chwo mondo gidagie gi nyithindgi. Sirkal e ma nomiya odno. Mine ariyo ma Joneno mag Jehova ne limoga mine moko ma ne wadakgo. Chieng’ moro ne adhi winjo mbaka ma gigoyoga. Ne adwaro ni mondo anyisgi ni Joneno gin joma wacho miriambo. Gima iwuoro en ni ne gidwoko penjoga duto e yo mamuol ka gitiyo gi Muma. Ne gin joma ng’won kendo mano nomora ahinya. Mano nomiyo ayie mondo gipuonja Muma.

Nitie wach moro ma ne apuonjora e Muma ma noloko ngimana. Chakre kinde ma ne pod atin ne aluoro tho. Nafwenyo ni Yesu nopuonjo ni ibiro chier jomotho! (Johana 5:28, 29) Napuonjora bende ni Nyasaye dewa. (1 Petro 5:7) Weche manie Yeremia 29:11 nojiwa ahinya. Ndikono wacho kama: ‘Nimar ang’eyo weche ma aparo kuomu, Jehova owacho, aparo mondo kuwe obedie ok masich piny, mondo amiu gi munyalo geno bang’e.’ Ne achako bedo gi geno ni kare anyalo dak e Paradiso e piny nyaka chieng’.—Zaburi 37:29.

Joneno mag Jehova nohera gi chunygi duto. Chieng’ mokwongo ma ne adhi e chokruok ne orwaka maber kendo ji duto ne mor koda. (Johana 13:34, 35) Mano nopogore ahinya gi kaka ne itimo e kanisawa. Joneno ne orwaka ma ok gidewo kit ngimana. Ne gilimaga kendo ne giikore konya kinde duto. Nawinjo ka gima an e kind joot mohera ahinya.

Weche ma ne apuonjora e Muma nomiyo afwenyo ni nitie gik monego atimie lokruok mondo adag e ngima ma moro Nyasaye. Ne ok yotna weyo madho ndawa. Bende, ne afwenyo ni nitie thumbe moko ma ne medo gombona mar madho njaga, omiyo naweyo winjo thumbego. Nikech nadwaro weyo kong’o, naweyo dhi e disko nikech kuro e ma nanyalo yude tem mar madho kong’o. Ne amanyo osiepe manyien ma ne nyalo konya mondo atim gik ma moro Nyasaye.—Ngeche 13:20.

E kindego, Tony bende nosebedo ka puonjre Muma gi Joneno mag Jehova. Joneno mag Jehova ne odwoko penjo ma ne en-go ka gitiyo gi Muma. Omiyo, en bende noyie ni gik ma nopuonjre ne gin adier. Ne otimo lokruoge madongo e ngimane. Noweyo osiepe maricho ma ne en-go chon, noweyo timbe mag mahundu, kendo noweyo madho njaga. Nikech ne wadwaro moro Jehova, ne wang’ado mar kendore e yo ma Jehova oyiego e higa mar 1982. Mano nokonyowa pidho wuodwa e yo mowinjore.

Ne ajamanyoga sula e Ohinga mar Jarito kod Amkeni! * ma wuoyo e wi joma ne oweyo timbe ma ne adwaro weyo. Ranyisi margi ne ojiwa ahinya! Nayudo teko mar dhi nyime ma ok ajok. Ne asiko akwayo Jehova mondo kik oweya. An gi Tony ne obatiswa Julai, higa mar 1982 ma wabedo Joneno mag Jehova.

Bedo gi winjruok maber gi Jehova Nyasaye noreso ngimana. An kaachiel gi Tony Jehova osekonyowa e kinde mag chandruok. Wasepuonjore keto genowa kuom Jehova e kinde mag chandruok kendo osekonyowa ahinya.—Zaburi 55:22.

Ne amor ahinya konyo wuoda gi nyara mondo gin bende ging’e Jehova. Kendo sani gin bende gikonyo nyithindgi mondo odong kong’eyo Nyasaye.

Tinde ok achiew gotieno kaparora ni abiro tho kata ni ang’o ma biro timorena e kinde ma biro. An kaachiel gi Tony wadich ahinya nikech walimo kanyakla mopogore opogore mag Joneno mag Jehova juma ka juma mondo wajiwgi. Wamor tiyo kanyachiel gi owete sama wapuonjo ji ni ka giketo yie kuom Yesu, to gin bende ginyalo yudo ngima mochwere.