Nyako moro matin noneno ka iro wuok e faktori kae to irogo noyarore mobedo kaka boche polo. Mano nomiyo ong’ado e chunye ni kanyo en kama ilose boche. Ka nyathi matin ok ong’eyo gimoro e yo maber, mano ok kaw ji gi wuoro. Kata kamano, ka ok wang’eyo gimoro e yo makare, mano nyalo ketho kama duong’ e ngimawa. Kuom ranyisi, ka ok wasomo maber kaka onego wamwony yath, mano nyalo kelonwa hinyruok.

Nyalo bedo marach moloyo ka ok wang’eyo e yo maber weche motudore gi winjruokwa gi Nyasaye. Kuom ranyisi, jomoko ne ok owinjo tiend weche ma Yesu ne puonjo. (Johana 6:48-68) Kar mondo ne gi dhi nyime chiko itgi, ne gikwedo puonj mag Yesu. Mano kaka puonj mabeyo nobayogi!

Be isomoga Muma mondo otayi e ngimani? Ka en kamano to itimo maber. Kata kamano, be samoro nyalo bedo ni ok iwinj tiend wach moro ma isomo e Muma? Mano timorega ne ji mang’eny. Wanon ane weche moko adek ma ji mang’eny ok osewinjo tiendgi maber.

• Chik manie Muma ma wacho ni “luor Jehova” en achiel kuom chike ma osetamo ji mang’eny winjo tiende. Giparo ni Nyasaye en Nyasaye mager. (Eklesiastes 12:13) Kata kamano, Nyasaye ok dwar ni joma lame obed gi paro ma kamano kuome. Owacho kama: “Kik iluor ni kech an kodi; we ng’eng’, ni kech an Nyasachi: anamii teko; ee, nakonyi.” (Isaiah 41:10) Tiend chikno en ni onego waher Nyasaye kendo wamiye luor matut.

• Nitie joma ok winj tiend ndiko ma wacho niya: “Gimoro amora matimore e pinyni timore mana e kinde ma Nyasaye oseketone. Nitie kinde mar nywol, gi kinde mar tho.” Giwacho ni Nyasaye nosechano ne ng’ato ka ng’ato odiechieng’ ma obiro thoe. (Eklesiastes 3:1, 2, The Bible in Luo, 1976) Kata kamano, ndikono nyiso mana gima timore e ngima dhano, nikech inyuologa ji to gikone githo. Wach Nyasaye bende puonjo ni yiero ma watimo nyalo miyo wadag higni mang’eny kata ooyo. Kuom ranyisi, ndiko wachonwa kama: “Luoro Jehova okelo ru mar ndalo mang’eny.” (Ngeche 10:27; Zaburi 90:10; Isaiah 55:3) E yo mane? Ka wamiyo Wach Nyasaye luor, ok wabi donjo e timbe ma hinyo ji kaka mer kod terruok.—1 Jo-Korintho 6:9, 10.

• Jomoko paro ni sama Muma wacho ni polo kod piny ‘okan ne mach,’ to ni mano koro nyiso ni Nyasaye biro ketho pinywani. (2 Petro 3:7) Kata kamano Nyasaye singonwa ni piny ok bi keth ngang’. Nyasaye “noloso mise mag piny, mondo kik oyiengini nyaka chieng’.” (Zaburi 104:5; Isaiah 45:18) Timbe ma richo ma opong’o piny e ma ibiro gol chuth mana ka gima iwang’ogi gi mach, to piny biro siko mana kaka en. Sama Muma wuoyo e wi polo, nyalo bedo ni owuoyo e wi kor lwasi ma waneno gi wang’wa, sulwe mang’eny mopong’o polo kata kama Nyasaye odakie. Mago duto ok bi kethi.

Mana kaka waseneno e ranyisigo, kinde mang’eny ji ok winj tiend weche ma gisomo e Muma e yo maber. Ang’o momiyo Nyasaye oseweyo mondo gima kamano otimre? Jomoko nyalo wacho niya: ‘Ka Nyasaye riek moloyo ji te kendo ong’eyo gik moko te, donge dine omiyowa buk ma ondik e yo moriere kendo ma winjo yot. Ang’o momiyo ne ok otimo kamano?’ Ne ane gik moko adek ma konyowa ng’eyo gimomiyo tiend weche manie Muma ok osebedo mayot winjo.

1. Muma ne olos mondo joma obolore kendo moikore puonjore ema owinj tiend weche  manie iye. Yesu nonyiso Wuon-gi kama: “Apaki e nyim ji duto Wuora, Ruodh polo gi piny, nimar iseumo wechegi ne jorieko gi joma osomo, kendo iseelogi ne nyithindo matindo.” (Luka 10:21) Muma ondik e yo ma joma obolore kende e ma nyalo winjo tiend weche manie iye. Joma osomo ahinya nyalo bedo gi kido mar ng’ayi to mano nyalo miyo ok giwinj tiend weche manie Muma e yo maber. Kata kamano, joma somo Muma ka gin gi chuny mobolore e ma nyalo winjo tiend Wach Nyasaye. To mano kaka Nyasaye oloso Muma e yo maber miwuoro!

2. Muma ne ondik ne joma dwaro ng’eyo gadier tiend weche manie iye. Yesu nowacho ni mondo ng’ato owinj tiend weche ma nopuonjo, nyaka ne konye. Ang’o ma nyalo konyo ng’ato mondo owinj tiend weche ma Yesu nopuonjo? Yesu nowacho kama: “Jakonyno, roho maler, ma Wuora biro oro e nyinga, en e ma obiro puonjou gik moko duto.” (Johana 14:26) Omiyo Nyasaye miyowa roho maler mondo okonywa winjo tiend weche manie Muma sama wasome. Kata kamano, Nyasaye ok chiw rohone maler ne joma ok ogene, to mano e momiyo joma kamago nyalo neno ni winjo weche manie Muma tek. Roho maler bende chwalo Jokristo ma oselony gi weche manie Muma mondo okony jomamoko ma diher winjo tiend wechego e yo maber moloyo.—Tich Joote 8:26-35.

3. Nitie ndiko moko ma wanyalo winjo tiendgi mana e kinde mowinjore. Kuom ranyisi, nonyis janabi Daniel mondo ondik wach moro e wi kinde ma biro. Malaika nonyise niya “Daniel, um, kitabu ma wechegi ondikie, ketie kido miluongo ni seal, nyaka ndalo ma wechegi nogikie nochopi.” Kuom higni mang’eny ji osebedo ka somo bug Daniel. Kata kamano, winjo tiend weche manie iye ok osebedo mayot. Gima iwuoro en ni kata mana Daniel owuon ne kiya tiend weche moko ma ne ondiko. Nowacho kobolore niya: “Nawinjo to wechegi ok nodonjona.” Gikone, ji ne dhi winjo tiend weche ma janabi Daniel nokoro, to mana e kinde mowinjore ma Nyasaye oyiero. Malaika nowachone kama: “Dhi adhiya, Daniel: nikech wechegi oseum, osetwegi gi kido, nyaka ndalo ma wechegi nogikie nochopi.” Gin jomage ma nyalo winjo tiend weche manie Muma? “Onge ng’ato kuom joma richo ma wechegi nodonjne, to wechegi nodonj ni joma riek.” (Daniel 12:4, 8-10) Omiyo, nitie tiend weche moko manie Muma ma Nyasaye ok fweny ne ji nyaka chop kinde mowinjore.

Be nitie kinde moro ma Joneno mag Jehova osewinjo wach moro manie Muma e yo ma ok kare? En kamano. Kata kamano, kane sa mar Nyasaye ochopo mar elo weche, Joneno notimo lokruoge ma dwarore mondo giwinj tiend wechego e yo makare. Gin gadier ni kuom timo kamano, giluwo ranyisi mar jolup Yesu ma noyie loko pachgi ka gibolore kinde duto ma Yesu ne rieyogi.—Tich Joote 1:6, 7.

Nyalo bedo ni nyako matin ma ne wasewuoyo kuome ne ok ong’eyo maber kuma boche polo wuokee. Kata kamano winjo tiend puonj ma yudore e Muma to en gima duong’ ahinya. Muma oting’o wach mapek kendo maduong’ ma ok wanyal somo asoma kendwa ma wawinj tiende maber. Omiyo, dwarore ni imany kony mondo iwinj tiend weche manie Muma. Many joma puonjore Muma ka gibolore kendo ka gin gi paro mowinjore, joma ong’eyo ni roho maler mar Nyasaye e ma nyalo konyogi mondo giwinj tiend weche manie Muma, kendo ma ong’eyo ni wadak e kinde ma Nyasaye dwaro ni wawinj tiend weche manie Muma e yo maber. Tudri gi Joneno mag Jehova kata inyalo dhi e websait mar jw.org. Muma nyisowa kama: ‘Dwar rieko, kendo many ng’eyo, to iniyud rieko ming’eyogo Nyasaye.’—Ngeche 2:3-5, Luo, 1976.