Faresego ringo matek ka tiendegi diko piny! Muma wuoyo kuom farese ang’wen-go kod joma oidhogi e yo maler ma nyalo miyo ng’ato opar ni gin farese ma ringo gadier! Faras mokwongo en rachar kendo ng’at ma oidhe en ruoth man gi osimbo. Faras ma luwe en ma kwar kendo ng’at ma oidhe en ng’at ma golo kuwe e piny. Faras mar adek en rateng’ kendo jal moidhe oting’o ratil mar pimo e lwete, ma nyiso ni chiemo ne dhi bedo manok. Faras mar ang’wen en mobokore, ma ochung’ ne tuoche kod masiche mager ma kelo tho. Liel bende luwe machiegni kokawo ngima ji mang’eny.—Fweny 6:1-8.

Crystal wacho niya: “Ka ne ahango somo wach farese ang’wen-go, naluor ahinya. Naparo ni Chieng’ Bura ne chiegni, to nikech ne ok aikora, ne ang’eyo ni ok adhi tony.”

Ed wacho kama: “Nawuoro ahinya joidh farese man gi rangi mopogore opogorego. Winjo tiend fwenyno e yo maber nonyong’a ndi!”

Dibed ni in bende iwinjo kiluor kaka Crystal nobedo maluor bang’ somo Fweny ma wuoyo e wi joidh farese ang’wen-go? Koso in bende wechego mori kaka ne gimoro Ed? Kata bed ni ineno joidh faresego e yo mane, wachgi ong’ere ahinya e bug Fweny ma e buk mogik e Muma. En adier ni ng’eyo tiend fwenyni nyalo konyi. E yo mane? Nyasaye singo ni inyalo yudo mor madier ka isomo, ipuonjori, kendo itimo gik ma ondik e bug Fweny.—Fweny 1:1-3.

Kata obedo ni jomoko bedoga maluor bang’ somo wach joidh farese ang’wen-go, wechego ok ondik mondo omi ji luoro. Mopogore gi mano, ji mang’eny oseneno kaka somo wach ma nokorno jiwo yie margi kendo miyogi geno maber mar kinde ma biro. In bende wechego nyalo konyi kamano! Ne ane wachno e sula maluwo mae.