Gige puonjo machalo kaka vidio, pichni, map kod mamoko, konyo ng’ato winjo tiend gima opuonjore. Jehova Japuonjwa Maduong’, ne otiyo gi gige puonjo mineno mondo ochiw puonj moko madongo. (Cha 15:5; Yer 18:1-6) Yesu bende notiyo gi gige puonjo mineno. (Mat 18:2-6; 22:19-21) Achiel kuom gige puonjo mineno mosebedo gi nyak e kindegi en vidio. Be ijatiyo gi vidio sama ipuonjo jopuonjreni mag Muma?

Oselosnwa vidio apar mondo okonywa sama wapuonjo ji ka watiyo gi brosua mar Wach Maber Mowuok Kuom Nyasaye! Moro ka moro kuom wiye vidiogo chal gi achiel kuom penjo mondik mong’ong’ore e brosuano. Brosua mar Wach Maber mayudore e websait kod e JW Library nigi kama kidiyo to otugoni moro ka moro kuom vidiogo. E wi mano, nitie vidio mamoko mayudore e bugewa mamoko manie Gik Mwatiyogo e Puonjo Ji Muma.

Dibed ni ipuonjo japuonjreni mar Muma wach moro matekne winjo? Koso dibed ni japuonjreni mar Muma kaloe tem moro matek? Many vidio mowinjore gi chal ma entie e websaitwa mar jw.org®, kod e JW Broadcasting®. Unyalo neno achiel kuom vidiogo ka un kanyachiel kendo uwuoye.

Dwe ka dwe nitie vidio manyien migologa. Sama inenogi tem ane paro kaka inyalo tiyo kodgi e puonjo jomoko.