GIMOMIYO MANO DWARORE: Mondo jopuonjre mag Muma obed gi winjruok maber gi Jehova, nyaka gichiwrene kendo obatisgi. (1Pe 3:21) Timo kamano miyo giyudo rit maber mowuok kuom Jehova nikech gichiworene. (Za 91:1, 2) Jakristo chiwore ne Jehova, to ok ne dhano, tich, kata riwruok moro amora. Mano e momiyo jopuonjre mag Muma nyaka her Nyasaye gi chunygi duto. —Rum 14:7, 8.

KAKA WANYALO TIMO MANO:

• Sama upuonjoru, kony japuonjre mondo one gima wach ma usomono puonje e wi Jehova. Jiwe mondo osom Muma pile ka pile kendo olem “kinde duto.”—1Th 5:17; Jak 4:8

• Jiw japuonjreni mondo one chiwruok kod batiso kaka okenge ma onyalo chope. Konye mondo otim gik mamoko kaka chiwo paro e chokruoge kata lendo ne jirendene kod joma gitiyogo. Par ni Jehova ok chun ng’ato ang’ata mondo otine. Chiwruok ne Nyasaye en yiero mar ng’ato owuon.—Rap 30:19, 20

• Jiw japuonjreni mondo otim lokruoge ma dwarore mondo omor Jehova kae to obatise. (Nge 27:11) Nikech nitie kido kod timbe moko mogurore kendo ma weyo tek, biro dwarore ni idhi nyime konyo japuonjreni mondo olony dhano machon kae to orwak dhano manyien. (Ef 4:22-24) Inyalo nyise sula moko ma wiye wacho ni “Muma Loko Kit Ngima Ji” ma yudorega e Ohinga mar Jarito.

• Nyise mor ma iseyudo e tiyo ne Jehova.—Isa 48:17, 18