Higa ka higa, Jokristo mang’eny mosedok chien chopoga e chokruok miparogo tho Yesu. Jokristogo nosechako ringo e ng’wech mar ngima, kata kamano, ne gidok chien nikech weche moko. Moko kuom wechego ne owuoye e brosua mar Duog ir Jehova. (Hib 12:1) Jehova pod ogeno ahinya Jokristo mosedok chien nikech ne ong’iewogi gi remb Wuode. (Tic 20:28; 1Pe 1:18, 19) Ere kaka wanyalo konyo Jokristo ma kamago mondo oduog e kanyakla?

Jodong kanyakla temo ahinya mondo gimany kendo gikony Jokristo mosedok chien mana kaka jakwath bende manyoga rombene molal. (Luk 15:4-7) Mano nyiso kaka Jehova oherowa. (Yer 23:3, 4) Ok jodong kanyakla kende e ma nyalo konyo Jokristo mosedok chien; waduto wanyalo timo kamano. Jehova mor gi kinda ma watimo mondo wanyisgi ng’wono kendo mano kelo gueth mogundho. (Nge 19:17; Tic 20:35) Omiyo, tem ane paro ng’at ma inyalo jiwo kae to itim kamano ma ok ideko!

NEURU VIDIO MA WIYE WACHO NI ENCOURAGE THE INACTIVE ONES, KAE TO UNON PENJO MA LUWOGI:

• En okang’ mane ma Abbey nokawo ka ne oromo gi Janeno ma ok ong’eyo?

• Ang’o momiyo onego wadhi ir jodongo ka pok wachako konyo Jokristo ma osedok chien?

• Ere kaka Abbey noikore kapok odok limo Laura?

• Ere kaka Abbey nonyiso kido mar sinani, horruok, gi hera sama ne otemo jiwo Laura?

• Ang’o ma wanyalo puonjore e wi ranyisi mar Yesu manie Luka 15:8-10?

• Gin gueth mage ma ne obedoe bang’ kinda ma ji mang’eny noketo e konyo Laura?