Gin jomage monego warwak gi mor? Ji duto mobiro e chokruogewa bed ni gin welo, osiepewa, kata Jokristo wetewa. (Rum 15:7; Hib 13:2) Nyalo bedo ni en Jakristo wadwa moa e piny moro machielo kata Jakristo moro ma ok osebedo ka biro e chokruoge kuom higni mang’eny. Par ane kaka inyalo winjo ka in e chal ma kamano. Donge inyalo bedo mamor korwaki gi mor? (Mat 7:12) Omiyo, donge ber ka itimo kinda mondo imos ji kapok chokruoge ochakore kendo ka chokruoge orumo? Mano kelo kuwe kod mor kendo Jehova yudo pak. (Mat 5:16) Seche moko ok bi bedo mayot wuoyo gi ji te mobiro e chokruok. Kata kamano, ka watimo kar nyalowa, ji duto biro bedo mamor e chokruogewa. *

Onego wabed gi tim mar rwako welo kinde duto, to ok mana kinde Rapar kende. Sama welo obiro e chokruogewa kendo gineno kaka waherore, gin bende ginyalo pako Nyasaye kendo giriwre kodwa e lamo madier.—Joh 13:35.