Chakre higa mar 2018, gasede ma watiyogo e tij lendo wuoyoga kuom wach achiel are chakruok mar gaset nyaka gikone. Gasedegi duto gin moko kuom gik ma watiyogo e puonjo ji Muma. Omiyo, onego wati kodgi e tijwa mar lendo. Wanyalo ting’o moko sama wan e safar kata sama wadhi e chiro. Gasedego ok olos mondo otigo e puonjo ji Muma, kata kamano gi nyalo miyo ng’ato obed gi siso mar gombo ng’eyo mathoth e wi Nyasaye.

Ka isechako wuoyo gi ng’ato, somne ndiko kae to inyise wach moro ma nyalo more ma yudore e gaset. Kuom ranyisi, ka en ng’at man gi joode, kata ma watne kata osiepne moro otho, kata ma nigi parruok mang’eny mag ngima, inyalo nyise kama: “Nyocha asomo wach machalo gi ma wawuoyoeni kamoro. Be diher mondo anyisigo?” Ka en gi gombo mar ng’eyo wachno, inyalo miye gasedno kata orone e simbe, kata bed ni en limbe mokwongo. Kata obedo ni dwarowa maduong’ ok en chiwo achiwa buge, gasedewa nyalo konyowa fwenyo joma oikore tiyo gi gik ma gipuonjore.​—Tic 13:48.