Jehova neno singruok ma joma okendore otimo kaka gima duong’ ahinya. Odwaro ni dichwo gi dhako mokendore kik keth kend margi. (Mat 19:5, 6) Nitie jotich Nyasaye mathoth ma kend maggi dhi maber kendo gidak gi kuwe kod mor. Kata kamano, onge kend makare chuth. Joma okendore romo gi pek moko e ngimagi. Nyaka wakwed paro ma ji mathoth nigo ni pogo dak kata ketho kend chuth e gima konyo e tieko chandruok manie kend. Ere kaka joma okendore nyalo rito kend margi?

Ne ane gik moko abich ma luwogi.

1. Rit chunyi kuom tamruok angera mag kisera gi ng’at ma ok jaodi kod yore mag mor ma nyiso timbe mag terruok, ma gin mana gik ma ketho kend mos mos.​—Mat 5:28; 2Pe 2:14.

2. Med tego osiep manie kindi gi Nyasaye kendo med timo gik ma more e kend maru.​—Za 97:10.

3. Dhi nyime rwako kit dhano manyien, kendo tim kata mana gik matindo tindo ma nyalo miyo jaodi omed bedo ma mor.​—Kol 3:8-10, 12-14.

4. Dhiuru nyime wuoyo e yo mang’won kendo gi luor e kindu.​—Kol 4:6.

5. Chiwuru gima owinjore e kend e yor luor kod hera.​—1Ko 7:3, 4; 10:24.

Sama Jokristo rito kend margi e yo maber, ginyiso ni gimiyo Jehova duong’ ma en jachak kend.

NEURU VIDIO MA WIYE WACHO NI NYAKA ‘WARING GI SINANI’​—LUW CHIKE MOKETNE JONG’WECH, KAE TO UDWOK PENJO MA LUWOGI:

• Kata obedo ni ngima mar kend nyalo chakore maber, gin pek mage ma nyalo betie?

• Ere kaka puonj mag Muma nyalo konyo joma paro ni kend margi onge hera?

• Gin chike mage ma Jehova oketo ne joma okendore?

• Ang’o ma joma okendore nyaka tim mondo kend margi odhi maber?