E kinde mag rapar, wayudoga thuolo mar paro matut e wi gueth ma wabiro yudo e kinde ma biro kokalo kuom rawar. Achiel kuom guethgo en chier. Jehova ne ok ochueyo dhano mondo otho. Mano e momiyo achiel kuom gik malit ahinya ma miyowaga kuyo en sama walalo ng’ato e tho. (1Ko 15:26) Yesu nowinjo malit ka noneno ka jopuonjrene ywago Lazaro. (Joh 11:33-35) Nikech Yesu en kido mar Wuon mare, wanyalo bedo gadier ni Jehova bende winjoga malit sama oneno ka wakuyo nikech walalo ng’atwa e otho. (Joh 14:7) Jehova gombo ahinya kinde ma obiro chieroe jotichne, wan be wagombo kindeno ahinya.—Ayu 14:14, 15.

Jehova en Nyasaye ma timoga gik moko e yo mochanore, kuom mano, wan gadier ni chier biro timore e yo mochanore maber. (1Ko 14:33, 40) Kar bedo gi liete, wabiro bedo gi thuolo mar rwako joma ochier. Be iparoga matut kuom chier, to moloyo e kinde ma ilalo ng’ato e tho? (2Ko 4:17, 18) Be igoyonega Jehova erokamano kuom chiwonwa rawar, kendo kuom elonwa e Ndiko ni jomotho biro bedo ma ngima kendo? —Kol 3:15.

• Gin osiepeni kod wedeni mage ma diher neno ka ngima kendo?

• Gin jomage manie Muma ma diher romogo kendo goyogo mbaka?