Higa ka higa, watimoga kinda mondo wagwel joma nie alworawa obi e rapar mar tho Yesu. Thoth joma wagwelogo gin joma ok wang’eyo. Kata kamano, onego wagwel nyaka joma wang’eyo. Kinde mang’eny joma biroga e Rapar gin joma wedegi kata jomamoko ma ging’eyo ema ogwelo. (yb08-SW 11 ¶3; 14 ¶1) Gin jomage ma inyalo gwelo?

• Wedeni

• Joma itiyogo kata joskul weteni

• Jirendeni

• Joma idok limo kod joma chon ne ipuonjorigo Muma kata ma ipuonjorigo sani

E wi mano, jodong-kanyakla biro gwelo joma odok chien moweyo tij lendo. To nade kapo ni ng’at ming’eyo ok odak machiegni kodi? Inyalo yudo sa kod kama ibiro time Rapar man machiegni gi kama odake ka idhi e jw.org/luo. Di WECHE E WIWA kae to idi “Rapar.” Sama iikori ne Rapar ma higani, tem ane paro joma inyalo gwelo kae to igwelgi.