Pasaka mogik ma Yesu ne dhi timo ne dhi bedo makende. Nikech thone ne chiegni, nochano timo Pasaka gi jootene kendo chako nyasi moro machielo miluongo ni Chiemo Modhiambo mar Ruodhwa ma ne idhi tim higa ka higa. Omiyo, nooro Petro gi Johana mondo odhi oik ot ma ne gidhi tiyogo. (Luk 22:7-13; ne picha man nyime.) Mano paronwa kaka wan bende onego waikre ne Rapar ma wabiro timo Mach 27. Kanyakla mathoth osetimo chenro mar ng’eyo ng’at ma biro golo twak, kaka gibiro yudo makate gi divai, kod gik mamoko. Kata kamano, wan to ere gima wanyalo timo ng’ato ka ng’ato mondo waikre ne Rapar?

Ik chunyi. Som ndiko moket mondo osom e kinde Rapar kendo ipar matut e wi ndikogo. Chenro mar somo ndikogo yudore e bug Nono Ndiko Pile. Apendiks B12 e Muma Maler​—Loko mar Piny Manyien nigi chenro moting’o weche mathoth. (Ne bende Chenro mar Ngimawa kod Tijwa Kaka Jokristo ma April 2020.) Joot nyalo yudo weche ma ginyalo tiyogo e lamo mar joot ma konyogi ng’eyo gimomiyo rawar en gima duong’ ahinya ka gitiyo gi Watch Tower Publications Index kata Buk Makonyo Joneno mag Jehova e Timo Nonro.

Gwel jomamoko e Rapar. Many thuolo momedore mar timo kampen. Tem ane paro joma inyalo gwelo kaka joma iselendonegi monego idog limo, joma ne ipuonjorigo Muma chon, joma ing’eyo, kod wedeni. Jodong-kanyakla onego ogwel joma osedok chien moweyo tij lendo. Ka po ni ng’ato ok odak e alwora ma untie, inyalo yudo sa kod kama ibiro time Rapar man machiegni gi kama odake ka idhi e jw.org/luo. Di WECHE E WIWA kae to idi “Rapar.”

Gin ang’o kendo ma wanyalo timo mondo waikre ne Rapar?