Daudi noloyo Goliath nikech nogeno kuom Jehova. (1Sa 17:45) Jehova dwaro tiyo gi tekone e konyo jotichne duto mogeno kuome. (2We 16:9) Ere kaka wanyalo nyiso ni wageno kuom Jehova to ok lony kod nyalo ma wan-go? Ne ane yore moko adek ma wanyalo timogo kamano:

• Lem kinde duto. Lem ka ikwayo Jehova mondo omiyi teko mar nyagruok gi tem to ok lemo mana sama ikwaye ng’wono bang’ timo gimoro marach. (Mat 6:12, 13) Lem ka ikwayo Jehova mondo omiyi rieko kendo otayi sama idwa timo yiero moko to ok mana lemo ni mondo oguedh yiero ma ne isetimo chon ka pok ilemo.​—Jak 1:5

• Bed gi chenro maber mar somo Muma kendo timo puonjruok ma mari iwuon. Som Muma pile ka pile. (Za 1:2) Par matut e wi ranyisi mag jotich Nyasaye machon manie Muma kendo iti gi puonj ma iyudo. (Jak 1:23-25) Ikri maber ne tij lendo kar makori mana gi yore ma isebedo ka itiyogo chakre chon. Tim ikruok maber ne chokruoge mag kanyakla mondo gik mipuonjo e chokruogego okonyi

• Riw lwedo riwruok mar oganda Jehova. Kinde duto ng’e gik ma riwruok mar oganda Jehova dwaro ni watim kendo kik idigni luwo kaka itayowa. (Kwa 9:17) Winj jodongo sama girieyi kendo sama gikonyi gi paro moko.​—Hib 13:17

NEURU VIDIO MA WIYE WACHO NI, OK ONEGO WALUOR SAND, KAE TO UDWOK PENJO MA LUWOGI:

• Gin gik mage ma owetewa gi nyiminewa noluoro?

• Ang’o ma nokonyogi mondo ginyagre gi gik ma ne giluorogo?