Masiche ma timore apoya tinde medore ameda. Sama masira otimore, tij konyo joma oyudo masira onego ochan e yo maber. Nikech mano, Bura Matayo osetimo chenro mondo ofis ka ofis obed gi Migawo Mochung’ ne Masiche.

Sama owete ma tiyo e migawono oyudo wach ni masira otimore kamoro, gitudore mapiyo gi jodong-kanyakla ma nie alwora ma masira otimoreno mondo gine kaka inyalo kony jolendo. Ka po ni masira motimoreno duong’ ahinya ma jolendo ok nyal konyo kendgi giwegi, ofis biro oro owete moko molony mondo ota tijno. Owetego nyalo kwayo kapo ni nitie joma nyalo chiwore konyo e tich kata chiwo gik ma dwarore mondo okony e masirano, kata ginyalo nyiewo gik ma dwarore kae to gipogo joma oyudo masira.

Timo gik moko e yo ma kamano kelo ber mang’eny. Mano miyo ji ok nwore e tich moro achiel kendo konyo e geng’o chochni ma nyalo betie ka owete otimo gik moko kendgi ma onge joma tayogi. E wi mano, pesa kod gik mantie itiyogo e yo maber.

Owete ma ofis oyierogo nyalo ng’eyo ni en pesa adi ma dwarore kod ji adi ma dwarore mondo okony e masirano. Owetego bende nyalo tudore gi joma nie sirkal mondo okonygi neno ni kony ochopo ne owete e yo mapiyo. Kuom mano, jomamoko ok onego ochak choko pesa, oro gik moko, kata dhi kama masira otimoree mak mana ka omigi thuolo mar timo kamano.

Kata kamano, pod dwaher konyo owetewa sama masira otimore. (Hib 13:16) Wahero owetewa ahinya! Ang’o ma wanyalo timo? Gima duong’ ma wanyalo timo en lemo ne joma oyudo masira kod joma ochiwore konyo e masirano. Bende, wanyalo golo chiwo ne tij piny mangima. Ka itayogi gi Bura Matayo, ofis mopogore opogore ong’eyo kuonde ma pesa ma ogolgo biro konyo owete gi nyimine e yo maber. To ka dwaher chiwore mondo wadhi wakony tich, wanyalo pong’o fom mar Ombi la Kujitolea Katika Kazi ya Usanifu na Ujenzi (DC-50).

NEURU VIDIO MA WIYE WACHO NI OULA MADUONG’ E PINY BRAZIL, KAE TO UDWOK PENJO MA LUWONI:

Ang’o ma mori kaka Joneno mag Jehova nochiwo kony e piny Brazil ka ne koth ochue maduong’ mokelo oula e higa mar 2020?