Nikech wan dhano morem, kinde duto wanyagore mondo gombo maricho kik chikwa. Ka wayie mondo gombogo ochikwa, wabiro ketho osiep ma nie kindwa gi Jehova. Kuom ranyisi, nitie joma oseyie mondo hero chiemo, lewni, kod udi omon-gi hero Nyasaye. Jomoko bende chopo gombogi mag nindruok ma ok gidewo chike mag Nyasaye. (Rum 1:26, 27) Jomoko to donjo e aola mag mbese nikech gombo mar dwaro ni ji ohergi kata oyie kodgi.​—Wuo 23:2.

Ere kaka wanyalo chiko gombo ma wan-go? Nyaka watim kinda mondo waket pachwa e gik ma moro Jehova. (Mat 4:4) E wi mano, onego wakwa Jehova mondo okonywa chiko gombowa. Nikech ang’o? Nikech ong’eyo gik ma nyalo konyowa kendo ong’eyo yo maber ma wanyalo chopogo gombo mabeyo ma wan-go.​—Za 145:16.

NEURU VIDIO MA WIYE WACHO NI, KIK IYIE NDAWA OKETH NGIMANI, KAE TO UDWOK PENJO MA LUWOGI:

• Ang’o momiyo jomoko madhoga ndawa?

• Madho ndawa nyalo hinyi nade?

• Ang’o momiyo madho ndawa kod ywayo shisha en gima rach?​—2Ko 7:1

• Ere kaka inyalo tamori madho ndawa kata weyo madho ndawa chuth?