Mondo jopuonjre Muma omor Nyasaye, nyaka gibed gi yie motegno. (Hib 11:6) Wanyalo chopo e chunygi ka watiyo gi bug Inyalo Dak gi Mor Nyaka Chieng’! Bugni oting’o ndiko madongo monego som, weche moler e yo ma winjore mayot, penjo ma miyo japuonjre paro matut, vidio ma mulo chuny ji, kod pichni mabeyo. Sama wakonyo jopuonjre Muma mondo obed gi kido mag Jokristo kendo gibed gi winjruok maber gi Nyasaye, mano nyiso ni wagedo gi gik ma ok nyal mako mach.​—1Ko 3:12-15.

Jomoko neno ni en gima tek bedo osiep Nyasaye nikech ok ginyal nene. Omiyo, dwarore ni wakonygi mondo ging’e kido mabeyo ma Jehova nigo kendo gigene.

NEURU VIDIO MA WIYE WACHO NI, GER YIE KUOM JEHOVA KA ITIYO GI BUG “INYALO DAK GI MOR NYAKA CHIENG’!” KAE TO UDWOK PENJO MA LUWOGI:

• Wang’eyo nade ni nyaminwano noikore maber ne puonjruok?

• Ere kaka notiyo gi penjo mamoko moik maber mondo okony japuonjre ochiw paro ma en-go e wi ndiko mar Isaya 41:10, 13?

• Vidio kod ndiko ma ne osom ne omulo nade chuny japuonjre?

Ji mang’eny ok ong’eyo gimoro amora e wi misango mar Yesu, kata ok ginene kaka mich ma Nyasaye nochiwo ne gin giwegi. (Gal 2:20) Kuom mano, nyaka wakonygi mondo gibed gi yie kuom misango mar Yesu.

NEURU VIDIO MA WIYE WACHO NI, GER YIE KUOM YESU KA ITIYO GI BUG “INYALO DAK GI MOR NYAKA CHIENG’!” KAE TO UDWOK PENJO MA LUWOGI:

• Wang’eyo nade ni owadwano noikore maber ne puonjruok?

• Ere kaka notiyo gi weche ma yudore e bwo wich ma wacho ni “Med Timo Nonro” mondo okony japuonjre?

• Ang’o momiyo lemo en gima dwarore ne japuonjre?