Muma ne okoro ni Satan ne dhi sandowa mondo kik wadhi nyime gi tij lendo. (Joh 15:20; Fwe 12:17) Ere kaka wanyalo konyo Jokristo wetewa ma isando e pinje mamoko? Wanyalo lemonegi. “Kwayo mar ng’at makare nigi teko kendo otiyo ahinya.”—Jak 5:16.

Gin gik mage ma wanyalo kwayo e lamo? Wanyalo kwayo Jehova mondo omi owetewa gi nyiminewa chir kendo mondo kik gibed maluor. (Isa 41:10-13) Bende, wanyalo lemo mondo joma nie sirkal kik chung tijwa mar lendo, kendo “mondo wadhi nyime dak e ngima mokuwe mos.”—1Ti 2:1, 2.

Kane isando Paulo gi Petro, Jokristo mokwongo ne olemonegi ka gihulo nyinggi achiel kachiel. (Tic 12:5; Rum 15:30, 31) Kata obedo ni ok wang’eyo nyinge duto mag Jokristo wetewa misando, donge wanyalo lemo ka wahulo kanyakla kata piny ma giaye?