Bug Gima Muma Puonjo kod Ang’o ma Muma Puonjo Kuom Adier? chalre. Bugegi duto oting’o adiera ma chalre kendo yo ma ochan-go sula manie igi bende chalre. Kata kamano, bug Gima Muma Puonjo tiyo gi weche mayot kendo puonj bende oler e yo ma winjore mayot. Olos bugno mondo okony joma yudo ka teknegi winjo tiend weche manie bug Ang’o ma Muma Puonjo Kuom Adier? Bug Gima Muma Puonjo onge gi apendiks, kar mano en gi weche momedore ma lero tiend weche moko ma otigo ei bugno. Onge penjo madongo moket e bwo wich maduong’ e sula ka sula kendo onge sanduku moting’o puonj madongo e giko sula. Kar mano, sula ka sula nigi kare mar puonj madongo ma lero adiera manie Muma ma owuo kuomgi e sula duto. Mana kaka bug Ang’o ma Muma Puonjo Kuom Adier? inyalo chiw sa asaya, bug Gima Muma Puonjo bende inyalo chiw kamano kata ka ok en achiel kuom buge ma walendogo e dwe. Ere kaka wanyalo tiyo maber gi kuonde mopogore opogore ma yudore e bug Gima Muma Puonjo sama watayo puonjruok mar Muma?

PUONJ MADONGO: Thoth ji ok ne pek moro amora gi yo ma wapuonjogo ji Muma ka watiyo gi bug Ang’o ma Muma Puonjo Kuom Adier? ma en somo paragraf kae to japuonjre chiwo dwoko mar penjo. Kata kamano, seche moko japuonjre ok winj dhokno maber kata ok ong’eyo somo maber. Kapo ni en kamano, inyalo tiyo gi kare mar puonj madongo ma yudore e giko sula ka sula e bug Gima Muma Puonjo e tayo puonjruogno, kae to ijiw japuonjre mondo osom sulano duto e sechene owuon. Unyalo puonjoru kuom dakika 15 ka unono adiera achiel. Tiyo gi yorni biro dwaro ni japuonj oikre maber koparo chal mar japuonjre, nikech kare mar puonj madongo ok oting’o weche duto ma oler e sulano. Ka japuonj otiyo gi sula duto e tayo puonjruok, onyalo tiyo gi kare mar puonj madongo e nwoyo weche ma gisepuonjore.

WECHE MOMEDORE: Weche manie bwo wijni ochan kaluwore gi kaka ochan sula ka sula. Japuonj nyalo yiero ka be obiro tiyo gi weche manie bwo wijni sama gidhi nyime gi puonjruok.