NGIMAWA KAKA JOKRISTO
Kaka Wanyalo Medo Lony e Tij Lendo—Lendo ka Watiyo gi Simo
GIMOMIYO MANO DWARORE: Lendo ka watiyo gi simo en yo maber ahinya mar chiwo “neno e okang’ malong’o chuth e wi wach maber.” (Tic 20:24) * Timo kamano konyowa mondo walend ne joma ok wanyal romogo achiel kachiel
KAKA WANYALO TIMO MANO:
-
Ikri. Yier wach mowinjore gi ng’at ma idwaro wuoyogo. Ndik wechego kaka diher wachogi. E wi mano, inyalo iko weche machuok ma lero gimomiyo igocho sama simb ng’at ma igochone odonjo e voicemail. Ber ka iketo gik moko duto ma ibiro tiyogo e mesa kendo ichan-gi maber ka pok ichako. Inyalo yawo JW Library® kata jw.org® chuth ka diher tiyogo
-
Kuwe mos. Wuo kaka iwuoyoga pile. Buonji kendo iti gi ranyisi mag del mana ka gima iwuoyo gi ng’atno achiel kachiel. Kik iling’ e yo ma ok owinjore. Lendo gi jomamoko bende konyo. Ka jal ma ilendoneno openjo penjo, inyalo nwoyo penjono gi dwol mondo nyawadu ma ulendogo bende okonyi manyo dwoko
-
Ket mise mar limbe maluwo. Ka ng’atno onyiso e yo moro amora ni omor gi mbaka ma ubedogo kode, inyalo weyone penjo ma ubiro wuoyoe chieng’ machielo. Wachne ni ka oyie to inyalo kowone buk moro gi e-mail, kata ni inyalo teronego achiel kachiel, kata inyalo kowone gi posta. Bende, inyalo kowone vidio kata sula moro ma yudore e bugewa kitiyo gi mesej kata e-mail. Inyalo nyise gik mamoko ma yudore e websaitwa
^ par. 3 Ka lendo gi simo nyalore e alwora ma idakie, ne ni iluwore gi chike matayo kaka onego oti gi weche e wi ng’ato.
