1 Jo-Korintho 1:1-31
1 An Paulo ma ne oluong mondo obed jaote Kristo Yesu kokalo kuom dwaro mar Nyasaye, an gi Sosthene owadwa
2 wandikonu un kanyakla mar Nyasaye man Korintho, un ma osemiu bedo maler e winjruok achiel gi Kristo Yesu, kendo ma oseluongu mondo ubed joma ler, kanyachiel gi ji duto ma luongo nying Ruodhwa Yesu Kristo kuonde duto, ma en Ruodhgi kod marwa bende:
3 Ng’wono mogundho kod kuwe moa kuom Nyasaye Wuonwa kod Ruodhwa Yesu Kristo mondo obed kodu.
4 Kinde duto agoyo ne Nyasaye erokamano kuomu nikech ng’wono mogundho mar Nyasaye mosemiyou kuom Kristo Yesu;
5 nimar e gik moko duto osemiyo ubedo momewo kuome, moriwo nyalo mar yalo wachne chuth kod ng’eyo chuth,
6 mana kaka neno michiwo e wi Kristo osegurore motegno e kindu,
7 mondo kik urem e mich moro amora ngang’, ka bende urito gi siso kinde ma Ruodhwa Yesu Kristo biro fwenyoree.
8 Bende, obiro miyou bedo motegno nyaka giko, mondo kik ubedie gi wach moro amora minyalo donjnugo e chieng’no mar Ruodhwa Yesu Kristo.
9 Nyasaye ma noluongou mondo ubed e achiel kod Wuode Yesu Kristo Ruodhwa, en Nyasaye migeno.
10 Owete, koro asayou kokalo kuom nying Ruodhwa Yesu Kristo ni mondo uduto uwuo ka un gi winjruok achiel, kendo kik ubed gi pogruok e kindu, to ubed e achiel chutho, ka un gi paro achiel kod dwaro achiel.
11 Nimar owetena, jomoko moa e od Kloe osekelona wachu, ni pogruok ni e kindu.
12 Tiend gima awacho en mae, ni ng’ato ka ng’ato kuomu wacho ni: “An mar Paulo,” “An to an mar Apolo,” “To an to an mar Kefa,” “An to an mar Kristo.”
13 Be Kristo opogore? Be Paulo e ma ne ogur e yath nikech un? Koso ne obatisu e nying Paulo?
14 Agoyo ne Nyasaye erokamano ni onge ng’ato ma nabatiso e kindu mak mana Krispo kod Gayo,
15 mondo ng’ato kik wach ni ne obatisu e nyinga.
16 Ee, adier ne abatiso jood Stefana bende. To kuom joma odong’, ok ang’eyo kabe ne abatiso ng’at moro machielo.
17 Nimar Kristo ne oora, ok ni mondo abatis ji, to ne oora mondo ayal wach maber; kendo mondo atim kamano, ok ka atiyo gi weche mag rieko dhano, mondo kik yadh-sand mar Kristo obed kayiem nono.
18 Nimar wach miyalo e wi yadh-sandno en fuwo e wang’ joma ochomo kethruok, to kuom wan ma iresowa, en yo ma Nyasaye nyisogo tekone.
19 Nikech ondik kama: “Anami rieko mar jorieko okethre kendo abiro tamora lony mar joma osomo.”
20 Ere ng’atno mariek? Ere jandiko? Ere jatwak molony e ndaloni? Donge Nyasaye osemiyo rieko mar pinyni odoko fuwo?
21 Nimar kata obedo ni piny kokalo kuom riekone ok nong’eyo Nyasaye, Nyasaye kuom riekone noneno ni ber mondo ores joma yie kokalo kuom wach miyalo ma nenore ka fuwo.
22 Jo-Yahudi dwaro ranyisi madongo, Jo-Grik bende manyo rieko;
23 wan to wayalo Kristo ma ne ogur e yath. Mano kelo ne Jo-Yahudi chwanyruok, to ogendni mamoko to neno mano kaka fuwo.
24 Kata kamano, kuom joma oluong, bed ni gin Jo-Yahudi kata Jo-Grik, Kristo en yo ma Nyasaye nyisogo tekone gi riekone.
25 Nikech gima ofuwo mar Nyasaye riek moloyo dhano, kendo gima nyap mar Nyasaye nigi teko moloyo dhano.
26 Nimar owetena, unyalo neno ni kuom joma ne oluongo, ok ne oluong ji mang’eny ma gin jorieko e yor ringruok, kata ji mang’eny ma gin joteko. Bende, ok ne oluong ji mang’eny mowuok e anyuola ma nigi huma;
27 to Nyasaye noyiero gik mofuwo mag piny mondo okelgo wich-kuot ne jorieko; kendo Nyasaye noyiero gik ma nyap mag piny mondo okelgo wich-kuot ne gik ma nigi teko;
28 bende, Nyasaye noyiero gik mocha mag piny kod gik ma ji kawo kayiem nono, ma gin gik ma onge, mondo omigo gik ma nitie obed kayiem nono,
29 mondo ng’ato kik pakre e wang’ Nyasaye.
30 To Nyasaye e ma osemiyo ubedo e winjruok achiel gi Kristo Yesu, jal ma oseelonwa rieko mar Nyasaye. Bende, osemiyo ikwanowa kaka joma kare e wang’ Nyasaye, osepwodhowa wabedo joma ler, kendo osegonyowa kokalo kuom rawar,
31 mondo weche obed mana kaka ne ondik niya: “Ng’at ma pakore, opakre kuom Jehova.”
