1 Jo-Korintho 13:1-13
-
Hera e yo maberie moloyo duto (1-13)
13 Ka an gi nyalo mar wuoyo e dhok mag dhano kata mag malaike to aonge gi hera, asebedo mana kaka okot ma ywak kata olang’ migoyo.
2 To ka an gi mich mar koro wach, kendo alony gi weche maler moum duto, kendo an gi ng’eyo duto, kendo ka an gi yie motegno ahinya ma anyalo kata mana daro gode, to aonge gi hera, an kayiem nono.
3 Bende, ka achiwo giga duto mondo apidhgo jomamoko, kendo ka achiwo ringra kaka misango mondo omi apakra, to aonge gi hera, onge ber moro ma ayudo kata matin.
4 Hera hore mos kendo ong’won. Hera onge gi nyiego. Ok opakre, ok obed gi sunga,
5 ok otim timbe ma ok nyis luor, ok omany mana gik ma kelone ber owuon, iye ok wang’ piyo. Ok omak tim marach motimne.
6 Ok omor gi tim ma ok kare, to omor gi adiera.
7 Odhil e weche duto, oyie weche duto, obedo gi geno kuom weche duto, onano e weche duto.
8 Hera ok rem ngang’. To ka nitie mich mag koro wach, gibiro lal nono; ka nitie dhum gi dhok mopogore opogore, gibiro rumo; ka nitie ng’eyo, gibiro lal nono.
9 Nimar sani wan gi ng’eyo morem, kendo wakoro wach morem,
10 to ka gima oromo chuth ochopo, ibiro gol gima orem oko.
11 Kane an nyathi, ne ajawuoyo ka nyathi, ne aparo ka nyathi, ne anono gik moko ka nyathi; to nikech koro asebedo ng’at maduong’, asewera gi kido mag nyathi.
12 Nimar sani waneno gik moko e yo ma tiptip kokalo kuom kio mar chuma, to bang’e wabiro neno gigo wang’ gi wang’. Gie sani an gi ng’eyo morem, to bang’e abiro bedo gi ng’eyo malong’o mana kaka Nyasaye ong’eya malong’o.
13 Kata kamano, koro adekgi e ma siko: yie, geno, kod hera; to maduong’ moloyogi en hera.
