1 Jo-Korintho 2:1-16
2 Omiyo, owetena, kane abiro iru, ok ne abiro ka atiyo gi weche madongo mag nyisruok kata weche mag rieko sama nayalonu wach maler moum mar Nyasaye.
2 Nimar kane an kodu, ne aketo chunya, ok kuom wach moro machielo, to mana kuom Yesu Kristo, kendo kuom jalno ma ne ogur e yath.
3 Kar mano, ne abiro iru ka anyap, ka aluor, bende ka akirni ahinya;
4 kendo wechena kod gik ma ne ayalo ne ok gin mag riekni mag loko pach ji, to ne gin ma nyiso roho kod teko mar Nyasaye,
5 mondo yieu kik tenre kuom rieko mar dhano, to otenre kuom teko mar Nyasaye.
6 Koro wayalo wach rieko e kind joma otegno e yie, to ok rieko mar ndaloni, bende ok rieko mar jotelo mag ndaloni, ma kargi biro bedo ma onge.
7 To wayalo wach maler moum ma en rieko mar Nyasaye, en rieko mopand, ma Nyasaye nochano motelo ka ndaloni ne pok ochopo, mondo wayud duong’.
8 Onge kata mana achiel kuom jotelo mag ndaloni moseng’eyo riekono nimar dine bed ni ging’eyo, dine ok ginego Ruodhwa ma nigi duong’.
9 To mana kaka ondik niya: “Wang’ pok oneno kendo it pok owinjo. Bende, gik ma Nyasaye oseiko ne joma ohere pok odonjo e chuny dhano.”
10 Nimar wan e ma Nyasaye oseelonwagi kokalo kuom rohone, nikech roho nono gik moko duto, nyaka gik matut mag Nyasaye.
11 Nikech en ng’a kuom dhano mong’eyo paro man kuom ng’at machielo mak mana chuny ng’atno owuon? Kamano bende, onge ng’at moseng’eyo paro man kuom Nyasaye, mak mana roho mar Nyasaye.
12 Koro ne warwako roho moa kuom Nyasaye, to ok roho* mar pinyni, mondo eka wang’e gik ma Nyasaye osemiyowa e yo mang’won.
13 Gigo bende wayalo, ok gi weche mipuonjo kuom riekni mag dhano, to gi weche ma roho maler puonjo, ka watiyo gi weche mag roho e lero gik motudore gi Nyasaye.
14 To dhand ringruok ok rwak gik moa kuom roho mar Nyasaye, nimar gigo gin fuwo e wang’e; kendo ok onyal ng’eyo gigo nikech inonogi kokalo kuom roho mar Nyasaye.
15 Kata kamano, dhano ma roho tayo nono gik moko duto, to en owuon onge dhano moro amora ma none.
16 Nikech “en ng’a moseng’eyo pach Jehova ma dopuonje?” Pach Kristo to wan-go.
Weche Moler Piny
^ Tiende ni, chuny kod paro ma chiko pinyni.
