1 Johana 3:1-24
3 Neuru kit hera ma Nyasaye Wuonwa osemiyowa mondo oluongwa ni nyithind Nyasaye! Kendo mano e kaka wasebedo. Mano e momiyo piny ok ong’eyowa nikech piny pok ong’eyo Nyasaye Wuonwa.
2 Un joma ahero, sani koro wan nyithind Nyasaye, kata kamano pok oelnwa maler gino ma wanabed. Wang’eyo ni e kinde mar fwenyruokne, wanabed ma chal kode nimar wabiro nene mana kaka en.
3 Kendo ng’ato ka ng’ato ma nigi genono e iye pwodhore owuon mobed maler mana kaka jalo bende ler.
4 Ng’ato ang’ata ma siko ka timo richo, ketho chik bende, to richo en ketho chik.
5 Ung’eyo bende ni jalo ne ofwenyore mondo ogolnwa richowa, kendo en owuon oonge gi richo kuome.
6 Ng’ato ang’ata ma siko e winjruok achiel kode ok sik ka timo richo; ng’at ma siko ka timo richo pok onene, bende pok ong’eye.
7 Un nyithindo matindo, kik uwe mondo ng’ato olalu; ng’at ma siko ka timo gik makare en ng’at makare, mana kaka jalo bende en ng’at makare.
8 Ng’at ma siko ka timo richo en ng’at ma Jachien chiko, nikech Jachien osebedo ka timo richo nyaka a chakruok. Mano e momiyo Wuod Nyasaye ne ofwenyore mondo oketh tije mag Jachien.
9 Ng’ato ang’ata moseyudo nyuol moa kuom Nyasaye ok sik ka otimo richo, nikech kodhi* mar Nyasaye siko kuom ng’at ma kamano, omiyo ok onyal siko ka timo richo nimar oseyudo nyuol moa kuom Nyasaye.
10 Nyithind Nyasaye kod nyithind Jachien ng’ere maler kuom wachni: Ni ng’ato ang’ata ma ok sik ka timo gik makare en ng’at ma ok oyie ni Nyasaye ochike. Kamano e kaka ng’at ma ok ohero owadgi bende chalo.
11 Nimar ma e wach ma usewinjo nyaka a chakruok, ni onego waherre e kindwa;
12 to kik wabed kaka Kain jal ma Ng’at Marach ne ochiko, mi nonego owadgi. To ang’o momiyo ne onego owadgi? En nikech timbene owuon ne richo, to timbe mag owadgi ne gin makare.
13 Owetena, kik uwuor nikech piny osin kodu.
14 Wang’eyo ni wasewuok e tho mi wachopo e ngima, nikech wahero owetewa. Ng’at ma onge hera siko e tho.
15 Ng’ato ang’ata ma timo sigu gi owadgi, jalo en janek, kendo ung’eyo ni onge janek ma ngima ma nyaka chieng’ siko e iye.
16 Koro waseng’eyo hera kokalo kuom wachni, ni jalo ne otho kochiwo ngimane nikech wan, omiyo wan bende onego wachiw ngimawa ne owetewa.
17 To ng’at ma nigi gige pinyni kendo oneno ka owadgi ochando gimoro, to otamore keche, ere kaka onyalo wacho ni ohero Nyasaye?
18 Un nyithindo matindo, ok onego wanyis hera mana gi wach kata gi lep kende, to bende gi tim kendo gi adiera.
19 Kuom timo kamano, wabiro ng’eyo ni wan mag adiera, kendo wabiro bedo gi chuny mokue e nyime
20 kuom wach moro amora ma chunywa nyalo ketonwae bura, nikech Nyasaye duong’ moloyo chunywa kendo ong’eyo gik moko duto.
21 Un joma ahero, kapo ni chunywa ok ketnwa bura, wabedo gi chir mar wuoyo gi Nyasaye ka wan thuolo;
22 kendo gimoro amora ma wakwayo, wayudo koa kuome nimar waluwo chikene kendo watimo gik mabeyo e wang’e.
23 Kuom adier, ma e chikne: ni wabed gi yie e nying Wuode Yesu Kristo kendo ni waherre e kindwa mana kaka nomiyowa chik.
24 E wi mano, ng’at ma luwo chikene, ng’atno siko e winjruok achiel kode kendo en bende osiko e winjruok achiel gi ng’atno. Kendo kuom roho maler ma nomiyowa, wang’eyo ni osiko e winjruok achiel kodwa.
Weche Moler Piny
^ Tiende ni, kodhi ma nigi nyalo mar nyuolo kata nyago olemo.
