1 Petro 2:1-25
2 Omiyo, koro goluru kuomu gik maricho duto, kod gango wach, gi wuondruok, gi ich-lit, kod kuoth maricho duto.
2 To kaka nyithindo mayom, beduru gi gombo mar madho chak ma ok onjawore mar wach Nyasaye mondo kokalo kuome, udong mi uchop e warruok
3 bang’ ka usebilo mi uyudo ni Ruodhwa ng’won.
4 Sama un ubiro ir jal ma en kidi mangima ma ji ne otamore, to ma en jal moyier kendo ma Nyasaye ogeno ahinya,
5 un uwegi ma un kaka kite mangima, igerou mondo ubed ot kokalo kuom roho mar Nyasaye mondo ubed e tij dolo maler, mondo uchiw misengni ma Nyasaye oyiego kokalo kuom Yesu Kristo.
6 Nimar Ndiko wacho kama: “Neuru! Aketo e Sayun kidi moyier, mise ma jaber ahinya ma en kidi moriwo kor ot; kendo onge ng’ato ang’ata ma keto yie kuome ma noywag ang’e ngang’.”
7 Kuom mano, un e ma kidino ber ahinya e wang’u, nimar un joma oyie; to kuom joma ok oyie, “kidi ma jogedo ne otamore, kidino osebedo kidi maduong’ moriwo kor ot,”
8 kendo osebedo “kidi ma chwanyo ji kod lwanda maduong’ ma miyo ji chwanyore.” Gichwanyore nikech gitamore luwo wach Nyasaye. To ne oyiergi nikech mano.
9 Un to un “oganda moyier, dolo mar jokaruoth, oganda maler, joma Nyasaye osekawo obed joge owuon, mondo uland e kuonde maboyo ber mogundho” mag Jalno ma noluongou kogolou e mudho kendo rwakou e ler mare miwuoro.
10 Nimar nitie kinde ma ok ne un oganda, to sani koro un oganda Nyasaye; nitie kinde ma ne pok okechu, to sani koro osekechu.
11 Un joma ahero, ma un mana welo kendo jodak ma kadho, asayou mondo udhi nyime bedo joma ok donj e gombo mag ringruok, ma gin gombo ma kedo kodu.
12 Sikuru ka un joma timbegi beyo e kind ogendni mondo sama gidonjonu ni un joketho, to gibed joma wang’gi neno timbeu mabeyo, mondo gimi Nyasaye duong’ e chieng’ ma obiro nonoe weche.
13 Nikech Ruodhwa, yieuru boloru e bwo teko mar chenro mag dhano: bed ni utimo kamano ne ruoth ma nigi duong’ mamalo
14 kata ne joloch ma gin gavana ma ruodhno ooro mondo okum joketho, to gipuo joma timo maber.
15 Nikech dwaro mar Nyasaye en ni kuom timo gik mabeyo, ubiro tueyo dho joma pachgi ok ni kare ma wacho gik ma ok ging’eyo.
16 Beduru kaka joma ni thuolo ka utiyo gi thuolono, ok kaka rageng’ ma upondoe mondo utim gik maricho, to tiuru kode kaka wasumbni mag Nyasaye.
17 Miuru ji mopogore opogore duto duong’, beduru gi hera ne riwruok duto mar owete, luoruru Nyasaye, miuru ruoth duong’.
18 Jotich mondo oyie bolore e bwo teko mar ruodhi maggi ka ginyisogi luor mowinjore, ok mana ne ruodhi mabeyo kendo ma tiyogo yot kende, to bende ne joma tiyogo tek.
19 Nimar en gima owinjore sama ng’ato nano e chandruok kendo isande to oonge ketho, nikech odwaro rito chunye obed ma onge bura e nyim Nyasaye.
20 Nikech ere ohala ma uyudo kapo ni igou nikech richo to unano? To kapo ni unano e chandruok moro nikech usetimo gima ber, mano en gima long’o e wang’ Nyasaye.
21 Kuom adier, mano e kit ngima ma noluongue, nimar kata mana Kristo noyudo sand nikech un, koweyonu ranyisi maber mondo uwuoth ka uluwo ondamo mage machiegni.
22 Ne ok otimo richo moro amora, kendo onge wuondruok ma ne oyud e dhoge.
23 Sama ne ijare, en to ne ok odwoko ka oyenyo. Sama ne isande, ne ok osiemo wang’gi; kar mano, ne oketore owuon e lwet Jal ma ng’ado bura kare.
24 En owuon noting’o richowa e dende owuon kane ong’awe e yath, mondo watho kuom richo kae to wabed mangima kuom timo gik makare. Kendo “kokalo kuom adhondene, ne ochangu.”
25 Nimar ne uchalo kaka rombe mobayo yo, to koro useduogo ir jakwadhu kendo jarit ngimau.
