1 Timotheo 3:1-16
3 Wachni en wach migeno: Ka ng’ato temo matek mondo obed jarit mar kanyakla, odwaro tich maber.
2 Omiyo, jarit mar kanyakla onego obed ng’at ma onge bura, chwor dhako achiel, ng’at ma timbene ok kal tong’, ma pache long’o, ma kit ngimane obidhore maber, mohero rwako ji, ma nigi nyalo mar puonjo,
3 ok jamer, ok ng’at mager, to obed ng’at ma pache ni kare, ok ng’at mohero ywaruok, ok ng’at mohero pesa,
4 ng’at ma tayo ode e yo maber, ma nyithinde winjo kaka ichikogi ka gikawo weche duto e yo mapek kaka dwarore
5 (nimar ka ng’ato ok ong’eyo kaka onyalo tayo ode owuon, ere kaka obiro rito kanyakla mar Nyasaye?),
6 kik obed ng’at ma eka nyocha orwako yie machiegni, dipo ka opong’ gi sunga mi olwar e bura moseng’ad ne Jachien.
7 E wi mano, bende onego obed gi nying maber kuom joma ni oko mondo kik okel wich-kuot kendo lwar e obadho mar Jachien.
8 Kamano bende, jokony-tich mag kanyakla onego obed joma kawo weche e yo mapek kaka dwarore, kik gibed gi lep ariyo, kik gibed joma madho divai mang’eny, ok joma nigi ich-lach mar yudo ohala e yor mibadhi,
9 gibed joma makore gi wach maler moum mar yie, ka gin gi chuny maler ma ok ketnegi bura.
10 Bende, okwong otemgi mondi mondo one ka giromo; eka bang’e gibed jotich mag kanyakla, nimar onge wach moro minyalo donjnegigo.
11 Mon bende onego obed joma kawo weche e yo mapek kaka dwarore, ok joma ketho nying jomamoko, kik gikal tong’ e timbegi, kendo gibed joma igeno e weche duto.
12 Jakony-tich mar kanyakla onego obed dichwo ma chwor dhako achiel, kendo ma tayo nyithinde kod ode e yo maber.
13 Nimar chwo ma tiyo e yo mowinjore yudo nying maber, kendo giwuoyo e wi yie man kuom Kristo Yesu ka gin gi chir ma onge luoro.
14 Andikoni wechegi kata obedo ni ageno biro iri mapiyo,
15 to kapo ni adeko, to mondo ing’e kaka in iwuon onego itim gik moko e kind jood Nyasaye, ma en kanyakla mar Nyasachwa mangima, ma e siro kod mise mar adiera.
16 Kuom adier, wach maler moumno, ma en wach chiwruok chuth ne Nyasaye, adier en gima duong’: ‘Ne omi onenore e ringruok, ne okete kare ka noyudo del mar roho, ne ofwenyore ne malaike, ne oyal wachne e kind ogendni, ji ne oyie kuome e piny, kendo ne orwake malo gi duong’.’
