2 Jo-Korintho 4:1-18
4 Kuom mano, nikech osemiwa tijni kokalo kuom kech mosenyiswa, ok waol.
2 To wasekwedo gik maricho ma ling’ling’, gik ma kelo wich-kuot, kendo ok wawuoth e yor wuond, to bende ok wanjaw wach Nyasaye; to kuom miyo adiera onenre ayanga, waketo ranyisi maber ne dhano duto mondo chunygi kik ng’adnwa bura e wang’ Nyasaye.
3 Kuom adier, ka wach maber ma walando ogeng’ore, ogeng’ore ne joma ochomo kethruok,
4 ma kuomgi nyasach ndaloni osedino pach joma ok oyie, mondo duong’ mar wach maber kuom Kristo ma en kit Nyasaye kik rienynegi.
5 Nikech ok wayal wachwa wawegi, to wayalo kwanyiso ni Kristo Yesu en Ruoth, kendo ni wan wasumbniu e lo Yesu.
6 Nimar Nyasaye e ma nowacho niya: “Ler mondo orieny koa e mudho,” kendo osemiyo lerno orieny e chunywa komiyo ng’eyo ma nigi duong’ miwuoro e wi Nyasaye orieny ne chunywa kokalo kuom wang’ Kristo.
7 Kata kamano, wan gi mwandu makendeni e gik mochue gi lowo, mondo teko mokalo mapile obed mar Nyasaye, to ok moa kuomwa.
8 Idiyowa matek e yore duto, to ok odinnwa chuth; wadhier nono, to ok ma onge gi yo chuth mar wuok;
9 isandowa, to ok jwang’wa; igowa piny, to ok tiekwa.
10 Kinde duto ringrewa nano e bwo sand ma nyalo kelonwa tho mana kaka Yesu, mondo ngima mar Yesu bende onenre ayanga e ringrewa.
11 Nimar wan ma wangima, pile waromo gi gik ma kelowa machiegni gi tho nikech Yesu, mondo ngima mar Yesu bende onenre ayanga e ringrewa ma tho.
12 Omiyo, tho tiyo kuomwa, to ngima tiyo kuomu.
13 Koro nikech wan gi chuny mar yie ma chal gi mano ma ne ondik niya: “Ne anyiso yie, kendo mano e momiyo ne awuoyo”; wan bende wanyiso yie, omiyo wawuoyo
14 ka wang’eyo ni Jal ma nochiero Yesu, biro chierowa wan bende kod Yesu, kendo obiro terowa kanyachiel kodu e nyime.
15 Nimar mago duto timore nikech un, mondo oganda mathoth momedore oyud ng’wono mogundho mar Nyasaye nikech ji momedore goyone erokamano kendo mano miye duong’.
16 Kuom mano, ok waol, kendo kata obedo ni e kit dhano ma wan gi oko dhi ka rumo, kuom adier e dhano ma wan gi ka iye to imiyo doko manyien pile ka pile.
17 Nimar kata obedo ni masiche ma wayudo gin ma kadho piyo kendo gitindo, gikone gibiro kelonwa duong’ ma siko medore ameda nyaka chieng’;
18 ka wachomo wang’wa, ok kuom gik mineno, to kuom gik ma ok ne. Nikech gik mineno ok sik, to gik ma ok ne siko nyaka chieng’.
