2 Jo-Korintho 6:1-18
6 Ka watiyo kanyachiel gi Nyasaye, wakwayou bende ni kik urwak ng’wono mogundho mar Nyasaye kae to wiu wil gi gimomiyo ne ochiwe.
2 Nimar owacho kama: “Ne awinjou e ndalo ma ayiego, kendo e chieng’ warruok, ne akonyou.” Neuru! Sani e ndalo moyiego moloyo. Neuru! Sani e chieng’no mar warruok.
3 Ok watim gima nyalo chwanyo ng’ato e yo moro amora mondo kik yudie ketho moro e tijwa ne Nyasaye;
4 to e yore duto, wanyiso ratiro ni wan jotich Nyasaye, kuom nano e gik mang’eny, kuom masiche, kuom ndalo mag chando, kuom gik matek,
5 kuom gocho, kuom tuech e jela, kuom oganda ma achach, kuom tich matek, kuom fuwo nindo, kuom ndalo ma ne onge chiemo;
6 kuom dak e ngima maler, kuom timo ka luwore gi ng’eyo, kuom horuok, kuom nyiso ng’wono, kuom yie mondo roho maler otawa, kuom nyiso hera ma onge wuondruok,
7 kuom wacho weche madier, kuom teko mar Nyasaye; kokalo kuom gik lweny makare ma wating’o e bedewa korachwich gi koracham,
8 kokalo kuom duong’ gi achaya, kokalo kuom weche maricho gi mabeyo ma ji wacho kuomwa. Ji kawowa kaka jowuond to wan jo adier,
9 kaka joma ji ok ong’eyo to koni ong’ewa, kaka joma owinjore gi tho, to neuru! eri wangima, ikumowa to ok chiwwa e lwet tho,
10 wachal joma okuyo to wail kinde duto, wachal joma odhier to koni waloko ji mang’eny jomwandu, wachal joma onge gimoro to koni wan gi gik moko duto.
11 Waseyawonu dhowa mondo wawuo kodu un Jo-Korintho, to chunywa bende waseyawonu mobedo thuolo.
12 Ok waseweyo ma ok wanyisu herawa, to un ok unyiswa herau.
13 Koro e yor chulowa—aloso kodu kaka dalos gi nyithinda—un bende yawuru chunyu obed thuolo.
14 Kik utueru e jok achiel gi joma ok ni e yie. Nikech en lalruok mane ma nitie e kind tim makare kod ketho chik? Koso, en winjruok mane ma nitie e kind ler kod mudho?
15 E wi mano, en winjruok mane ma nitie e kind Kristo kod Belial? Bende, en ang’o ma riwo ng’at manie yie kod ng’at ma ok ni e yie?
16 Kendo en winjruok mane ma nitie e kind hekalu mar Nyasaye kod sanamu? Nimar wan hekalu mar Nyasaye mangima; mana kaka Nyasaye nowacho niya: “Anadag e kindgi kendo anawuoth e diergi, mi anabed Nyasachgi, to ginibed joga.”
17 “Jehova owacho kama: ‘Kuom mano, auru e kindgi, kendo upogru kodgi, kendo weuru mulo gima ok ler’”; “‘mi anarwaku iye.’”
18 “Jehova Manyalo Duto owacho kama: ‘Kendo anabednu wuoro, to unubed yawuota kod nyiga.’”
