2 Jo-Thesalonika 1:1-12
1 An Paulo, gi Silvano, kod Timotheo, wandikonu un kanyakla mar Jo-Thesalonika, manie winjruok achiel gi Nyasaye Wuonwa kod Ruodhwa Yesu Kristo:
2 Ng’wono mogundho kod kuwe moa kuom Nyasaye Wuonwa kod Ruodhwa Yesu Kristo mondo obed kodu.
3 Owetewa, kinde duto wan gi ting’ mar goyo ne Nyasaye erokamano nikech un. Mano owinjore nikech yieu siko ka dongo moloyo, kendo hera ma ng’ato ka ng’ato nigo e kinde gi nyawadgi medore.
4 Nikech mano, wan wawegi wan gi sunga kuomu ne kanyakla mag Nyasaye nikech sinani maru kod yieu ka ukalo e sand kod chal matek duto.
5 Mano en gima nyiso bura makare mar Nyasaye ma miyo ikwanou kaka joma owinjore gi Pinyruodh Nyasaye, ma kuom adier e momiyo uyudo sand.
6 Nikech mano, en gima kare ka Nyasaye kelo masira ne joma kelonu masira.
7 To un ma uyudo masiche, ibiro miu yueyo kanyachiel kodwa e chieng’no ma Ruodhwa Yesu biro fwenyoree koa e polo ka en-gi malaikene ma nigi teko
8 e mach ma liel, sama ochulo kuor kuom joma ok ong’eyo Nyasaye kod joma ok luw wach maber e wi Ruodhwa Yesu.
9 Jogo biro yudo buch kum mar kethruok ma nyaka chieng’ kigologi gia e nyim Ruodhwa kod nyim duong’ mar tekone,
10 e kinde ma ibiro miyee duong’ kanyachiel gi joge maler, kendo e chieng’ono jogo duto ma nonyiso yie nohum kuome nimar neno ma ne wachiwo nomiyo ubedo gi yie.
11 Nikech mano, kinde duto walamonu ni mondo Nyasachwa okwanu kaka joma owinjore gi luong ma ne oluongoue, kendo kokalo kuom tekone ochop chuth duto mabeyo ma more kod tijeu ma nyiso yie.
12 Mano en ni mondo nying Ruodhwa Yesu oyud duong’ kuomu, to un bende uyud duong’ e winjruok achiel kode ka luwore gi ng’wono mogundho mar Nyasachwa kod mar Ruodhwa Yesu Kristo.
