2 Petro 2:1-22
2 Kata kamano, jonabi mag miriambo bende ne osieko e kind oganda, mana kaka jopuonj mag miriambo bende biro sieko e kindu. Jogi biro kelo ling’ling’ kidienje ma ketho yie mar ji, kendo ginikwed kata mana ruodhgi ma e ma ne ong’iewogi, ka mano kelo kethruok mapiyo kuomgi giwegi.
2 E wi mano, ji mang’eny noluw timbegi mag wang’-teko, kendo nikech joma kamago, ji biro wacho weche ma chayo adiera.
3 Bende, nikech ich-lach, giniwuondu gi weche ma nenore kaka adier. Kata kamano, bura ma noseng’adnegi chon ok bi mos, kendo kethruokgi ok nind.
4 Kuom adier, Nyasaye ne ok oweyo ma ok okumo malaike ma notimo richo, to nowitogi e kar tuech miluongo ni Tataro, motueyogi gi nyoroche mag mudho mandiwa mondo okan-gi ne bura.
5 Kendo ne ok oweyo ma ok okumo piny machon, to Noa jal ma ne yalo wach makare norito maber kanyachiel gi ji abiriyo mamoko mi ne gitony ka nokelo ataro mar pi kuom piny mar joma ne ok oluoro Nyasaye.
6 Kendo kuom ketho taonde mag Sodom gi Gomora mi gilokore buru, ne okumogi, ka mano keto ranyisi mar gik ma nobi kuom joma ok oluoro Nyasaye.
7 Kendo ne oreso Lut ng’at makare, ma chunye ne chandore ahinya nikech tim wang’-teko mar joketh-chik—
8 nimar timbe mag ketho chik ma ng’at makareno ne neno kendo winjo odiechieng’ kodiechieng’ ka nodak e kindgi ne sando chunye ahinya.
9 Kuom mano, Jehova ong’eyo kaka onyalo reso joma nyiso ni gichiworene chuth ka ogologi e tem moro amora, kendo ong’eyo kano joma ok kare mondo obi okethgi e chieng’ bura,
10 to moloyo, joma dwaro chido ringre jomamoko kendo mochayo loch manie wigi.
Nikech gin joma wang’gi tek kendo ma wigi tek, ok giluoro kata mana wuoyo ka gichayo joma Nyasaye osemiyo duong’,
11 to malaike, kata obedo ni gin gi teko kod nyalo maduong’ moloyogi, ok gidonj ne jogo ka gitiyo gi weche mag achaya, nimar gimiyo Jehova luor.
12 To mana kaka le ma ok ti gi paro, ma luwo mana kaka ne ochuegi, kendo minyuolo mana mondo omakgi kendo oneggi, jogo wuoyo ka gichayo gik ma gikia. Gibiro yudo kethruok nikech kit ngimagi marach,
13 ka giyudo hinyruok kaka pok margi nikech kit ngimagi marach.
Gihero dak e ngima mar mor mag piny, kata mana godiechieng’. Gin kaka chilo kod mbelni e kindu, nimar gimor ahinya gi puonj ma giwuondogo ji sama gimetho kendo gichiemo kodu.
14 Wengegi opong’ gi chode kendo ok ginyal weyo timo richo, kendo giyondho joma ok ochung’ motegno. Gin gi chuny ma osetieg mana ne ich-lach. Gin nyithindo mokuong’.
15 Nikech gisejwang’o yo moriere tir, osewuondgi mi gibayo yo. Giseluwo yor Balam wuod Beor, ma nohero pok mar ketho,
16 to ne okwere nikech ketho tim makare. Le ma ting’o osigo, ma ok nyal wuoyo, noloso kode gi dwond dhano mi nogeng’o neko ma janabino ne nigo.
17 Jogo gin sokni ma onge pi, kendo gin ong’ueng’o ma yamb koth mager riembo, kendo osekan-gi ne mudho mandiwa.
18 Gitiyo gi weche madongo mag ng’awruok, ma gin weche manono. Kuom luwo gombo mag ringruok kod timbe mag wang’-teko, giyondho joma eka oa tony e lwet joma odak e ketho.
19 Gisingonegi thuolo to gin giwegi gin wasumbni mag richo; nikech ka ng’ato oloyo nyawadgi, jal moseloyono bedo misumbane.
20 Kuom adier, bang’ ka giseweyo chilo mag piny nikech ng’eyo malong’o ma gin-go e wi Ruodhwa kendo Jawarwa Yesu Kristo, gisedok kendo e gigo sie kendo gigo loyogi, eka gikone kit ngimagi bedo marach ahinya moloyo kaka ne gin mokwongo.
21 Dine obedo maber moloyo ka dine ok ging’eyo malong’o yo makare, kar ng’eyo yorno to bang’e gilokore mi giwe chik maler ma ne giseyudo.
22 Wach ma ngero moro madier nowacho osetimore kuomgi kama: “Guok osedok e ng’okne, kendo anguro moselwok osedok ng’ielore e chuodho.”
