2 Timotheo 2:1-26
2 Kuom mano, in nyathina, dhi nyime nwang’o teko kuom ng’wono mogundho man kuom Kristo Yesu;
2 kendo weche ma ne iwinjo koa kuoma ma joneno mang’eny bende ne osiro, iket wechego e lwet joma inyalo gen, mondo gin bende gibi gibed gi nyalo chuth mar puonjo jomamoko.
3 Kaka jalweny maber mar Kristo Yesu, in bende yie yudo masiche.
4 Onge ng’at ma tiyo kaka jalweny ma donjore kendo gi ohelni mapile mag ngima, nimar odwaro bedo malong’o e wang’ jal ma nondike kaka jalweny.
5 Kendo kata mana e tuke, ok nyal sidh osimbo ne ng’ato ang’ata ma piem, mak mana ka opiem ka luwore gi chike mag tugo.
6 Japur ma tiyo matek e ma nyaka kwong cham olemo mag puothe.
7 Sik ka iketo pachi kuom weche ma awachogi; to Ruodhwa biro miyo ibed gi rieko mar ng’eyo tiend weche e gik moko duto.
8 Ng’e ni ne ochier Yesu Kristo a kuom joma otho kendo ne oa e anyuola mar Daudi ka luwore gi wach maber ma ayalo
9 ma e momiyo sani ayudo sand kendo otueya e jela kaka jaketho. Kata kamano, wach Nyasaye to ok nyal tue.
10 Mano e momiyo adhi nyime nano e weche duto nikech joma oyier mondo gin bende giyud warruok kuom Kristo Yesu kaachiel gi duong’ mochwere.
11 Wachni en wach migeno: Ni kuom adier kane watho kanyachiel kode, wanabed mangima kanyachiel kode bende;
12 ka wadhi nyime nano, wanaloch bende kanyachiel kode kaka ruodhi; ka wakwer ni ok wang’eye, en bende obiro kwer ni ok ong’eyowa;
13 ka ok wamakore gi Nyasaye, en to osiko ja adier nimar ok onyal kwedore owuon.
14 Dhi nyime paronegi wechegi, ka ichikogi e nyim Nyasaye ni kik gibed gi ywaruok e wi weche ma gitiyogo, ma en gima ok kony kata matin, nimar mano hinyo joma winjogi.
15 Tim duto kar nyaloni mondo inyis ni in ng’at malong’o e wang’ Nyasaye, jatich ma onge gima kuodo wiye, kitiyo gi wach mar adiera e yo makare.
16 Kik idonj e weche manono ma njawo gik maler; nimar gibiro medo mana kelo timbe ma ok nyis luoro Nyasaye
17 kendo wechegi biro nya kaka adhola ma landore. Himenayo kod Fileto gin moko kuomgi.
18 Jogo osebaro moweyo adiera ka giwacho ni chier en gima osetimore, kendo giketho yie mar jomoko.
19 Kata kamano, mise motegno mar Nyasaye osiko ka ogurore, kendo en gi kido mondik ni, “Jehova ong’eyo joma gin joge,” kendo ni, “Ng’ato ka ng’ato ma luongo nying Jehova mondo okwed tim ma ok kare.”
20 Koro e ot mang’ongo nitie gik molos, ok mana gi dhahabu kod fedha kende, to bende gi bepe kod lowo, kendo moko gin mag tich ma imiyo duong’ to mamoko gin mag tich ma onge gi duong’.
21 Omiyo, ka ng’ato bedo mabor gi gik ma tichgi onge duong’go, obiro bedo gir tich molos ne tich mimiyo duong’, mopwodh maler, ma konyo wuon-go, kendo moseik ne tije duto mabeyo.
22 Omiyo, ring ia kuom gombo mag rowere, to law tim makare, gi yie, gi hera, kod kuwe kanyachiel gi joma luongo Ruodhwa ka gin gi chuny maler.
23 E wi mano, kik idonj e mbaka mag fuwo gi mino wach ma onge rieko, king’eyo ni gikelo mana dhawo.
24 Nimar misumba Ruodhwa ok onego odhaw, to dwarore ni obed ng’at mamuol gi ji duto, ma nigi nyalo mar puonjo, ma nyiso ritruok sama okethne,
25 ng’at ma puonjo jo akwede e yor muolo. Dipo ka Nyasaye omiyo giloko chunygi gia e richo mi gibed gi ng’eyo malong’o kuom adiera,
26 kendo dipo ka pachgi oduogo mi gitony gia e obadho mar Jachien, bang’ fwenyo ni osemakogi ka gingima mondo gitim dwache.
