Fweny 12:1-17
12 Eka ranyisi moro maduong’ ne onenore e polo: Ne nitie dhako moro mobidh gi wang’-chieng’, to dwe ne ni e bwo tiendene, kendo e wiye ne nitie osimbo moro ma nigi sulwe 12,
2 to ne en gi ich. Kendo ne oywak matek nikech muoch gi rem maduong’ ma ne en-go nikech ne odwaro nyuol.
3 Ranyisi machielo ne onenore e polo. Ne aneno thuol moro mang’ongo ma kwar ka mach, kendo ne en gi wiye abiriyo gi tunge apar, to e wiyego ne nitiere osimbo abiriyo;
4 to yiwe ne ywayo achiel kuom adek mag sulwe duto mag polo, kendo ne owitogi e piny. To thuol mang’ongono nomedo chung’ e nyim dhako ma ne chiegni nyuolno, mondo ka osenyuol, to ongam nyathineno.
5 Kendo dhakono nonyuolo nyathi ma wuowi ma biro bedo jakwadh ogendni duto kotiyo gi luth mar chuma. To nyathineno ne oyudh mi oter malo ir Nyasaye kendo nyaka e kom-lochne.
6 To dhakono noringo modhi e thim kama Nyasaye noseikone, kendo ne gidhi pidhe kuno kuom odiechienge 1,260.
7 Eka lweny ne omuoch e polo: Mikael gi malaikene ne okedo gi thuol mang’ongono, to thuol mang’ongono gi malaikene bende ne okedo kodgi,
8 to thuondno ne ok olocho ngang’, kendo kargi koro ne onge kendo e polo.
9 Mi ne owit thuol mang’ongono mwalo, ma en thuol machon, miluongo ni Jachien kendo Satan, ma wuondo piny mangima; ne owite e piny, kendo malaikene bende ne owit kode.
10 Ne awinjo dwol moro maduong’ e polo ka wacho niya:
“Koro warruok, gi teko, gi Pinyruodh Nyasachwa, gi loch mar Kristone osechopo, nikech osewit piny jadonj ne owetewa, ma donjonegi odiechieng’ gi otieno e nyim Nyasachwa!
11 Mi ne giloye nikech remb Nyarombo kendo nikech wach mar neno ma ne gichiwo; bende, ne ok gihero ngimagi kata mana ka tho ne ochomogi.
12 Nikech mano, beduru mamor un polo kod joma odak e iye! To yaye! nobed malit ne piny kod nam, nimar Jachien oselor mwalo iru ka en gi mirima mager, kong’eyo ni odong’ mana gi kinde manok.”
13 Koro ka thuol mang’ongono noneno ni osewite mwalo e piny, nosando dhako ma nonyuolo nyathi ma wuowino.
14 To ne omi dhakono buombe ariyo mag winyo maduong’ miluongo ni ongo mondo ohu godo nyaka kare e thim, kama ne idhi pidhee kuom ndalo achiel, gi ndalo ariyo, gi nus ndalo, kama bor gi thuondno.
15 To thuondno nong’ogo pi ma chal gi aora koa e dhoge ka olawogo dhakono mondo omi aorano oim dhakono.
16 To piny nokonyo dhakono, kendo piny noyawo dhoge mi omuonyo aora ma thuol mang’ongono noyudo oseng’ogo koa e dhoge.
17 Omiyo, thuol mang’ongono nobedo gi mirima gi dhakono mi nowuok mondo odhi oked gi joma odong’ mag koth dhakono, ma makore gi chike Nyasaye kendo ma nigi tij chiwo neno e wi Yesu.
