Fweny 13:1-18
13 Kendo thuondno ne ochung’ mana kar tiende e kuoyo manie nam.
Eka ne aneno ondiek moro ka wuok ei nam, ne en gi tunge apar gi wiye abiriyo, kendo e wi tungenego ne nitie osimbo apar, to wiyenego ne nigi nying mag chayo Nyasaye.
2 Koro ondiek ma ne anenono ne chalo gi kwach, to tiendene ne chalo gi tiende dubu, to dhoge ne chalo gi dho sibuor. To thuol mang’ongono ne omiyo ondiegno teko, gi kom-loch, kod loch maduong’.
3 Ne aneno achiel kuom wiyene ma ne nenore ni ne osego lero ma nyalo kelo tho, kendo adhola ma ne nyalo kelo thono koro nosechango, kendo piny duto noluwo ondiegno ka gimor kode.
4 Kendo ne gilamo thuol mang’ongono nikech ne osemiyo ondiegno teko mar loch, kendo ne gilamo ondiegno ka giwacho niya: “En ng’a ma chal gi ondiegni, kendo en ng’a ma nyalo kedo kode?”
5 Ne omiye dhok ma wacho gik madongo kod weche mag achaya, kendo ne omiye teko mar tich kuom dweche 42.
6 Mi noyawo dhoge kowacho weche mag achaya e wi Nyasaye, mondo oyany nyinge gi kar dakne, to kata mana joma odak e polo bende.
7 Ne oyiene kedo e lweny gi joma ler kendo loyogi, kendo ne omiye teko e wi dhoudi duto, gi ji mopogore opogore duto, gi dhok duto, kod ogendni duto.
8 Kendo ji duto modak e piny biro lame. Nyaka a chakruok mar piny, onge kata nying ng’ato achiel kuomgi mosendik e bug* ngima mar Nyarombo ma ne oseyang’ kaka misango.
9 Ng’at ma nigi it mondo owinj.
10 Ka nitie ng’at ma nyaka ter e tuech, obiro dhi e tuech. To ka nitie ng’at ma biro neko gi ligangla, nyaka neg ng’atno gi ligangla. Mano biro dwaro ni joma lergo obed gi sinani kod yie.
11 Eka ne aneno ondiek machielo ka wuok ei piny, kendo ne en gi tunge ariyo ka mag nyarombo, to nochako wuoyo kaka thuol mang’ongocha.
12 Otiyo gi teko duto mag ondiek mokwongocha ka en e nyim ondiegno. Bende, omiyo piny kod joma odak e iye lamo ondiek mokwongono, ma adholane ma ne nyalo kelo tho ne osechango.
13 Kendo otimo ranyisi madongo, ka omiyo kata mana mach lor koa e polo nyaka e piny ka oganda dhano neno.
14 Owuondo joma odak e piny nikech ranyisi ma ne oyiene timo e nyim ondiegno, ka owacho ne joma odak e piny mondo gilos kido mar ondiegno ma noyudo osego gi ligangla to koro ne osebedo mangima.
15 Bende, ne oyiene miyo kido mar ondiegno muya, mondo kido mar ondiegno owuo kendo mondo omi oneg ji duto ma tamore lamo kido mar ondiegno.
16 Oketo ji duto e bwo achune—joma tindo gi joma dongo, jomwandu gi joma odhier, joma ni thuolo kod wasumbni—mondo oket ne jogo alama e lwetgi korachwich, kata e lela wang’gi,
17 kendo mondo kik ng’ato ang’ata ong’iep kata ous, mak mana ng’at moseketne alamano, ma en nying ondiegno kata namba mochung’ ne nyingno.
18 Mano dwaro ni ng’ato obed gi rieko: Ng’at ma nigi nyalo mar nono weche e yo matut mondo ogo kwan mar namba mar ondiegno, nimar en namba mar dhano, kendo nambaneno en 666.
Weche Moler Piny
^ Buge ma kamago ne gin midolo e kede, to ne ilosogi gi pien kata gi gik mamoko.
