Fweny 2:1-29
2 “Ndik ne malaika mar kanyakla man Efeso kama: Magi e weche ma jal momako sulwe abiriyo e lwete korachwich wacho, ma en jal ma wuotho e dier gige chungo teyni abiriyo mag dhahabugo:
2 ‘Ang’eyo timbeni, gi tiji matek, kod sinani mari, kendo ni ok inyal yie gi joma richo; bende, ne ikwongo itemo joma wacho ni gin joote, to ok gin, kendo ne iyudo ni gin jomiriambo.
3 Bende, inyiso chuny mar nano, kendo isetimo sinani nikech nyinga to pok iol.
4 Kata kamano, an gi wachni kodi, ni iseweyo hera ma ne in-go kar chakruok.
5 “‘Kuom mano, par kama iseaye ka ilwar, kendo ilok chunyi ia e richo, kae to itim gik ma ne ijatimo kar chakruok. Ka ok itimo kamano to anabi iri, kendo abiro golo gir chungo taya mari oa kare, mak mana ka iloko chunyi ia e richo.
6 Nitie wach moro maber kuomi: ni pod isin gi timbe mag kidieny mar Jo-Nikolao, ma an bende asin-go.
7 Ng’at ma nigi it mondo owinj gima roho wacho ne kanyaklago: Ng’at ma olocho abiro yiene chamo olemb yadh ngima manie paradiso mar Nyasaye.’
8 “To ndik ne malaika mar kanyakla man Smirna kama: Magi e weche ma jalo wacho, ‘jal Mokwongo kendo Mogik,’ ma ne otho mi obedo mangima kendo:
9 ‘Ang’eyo masicheni kod dhierni—to imewo—bende, ang’eyo achaya mar joma luongore giwegi ni Jo-Yahudi to kuom adier ok gin, to gin mana sunagogi mar Satan.
10 Kik iluor sand ma ichiegni yudo. Ne! Jachien biro dhi nyime wito jomoko kuomu e jela mondo uyud tem chuth, kendo mondo ubi uyud masiche kuom ndalo apar. Chung’ motegno kata mana nyaka e tho, to anamiyi osimbo mar ngima.
11 Ng’at ma nigi it mondo owinj gima roho wacho ne kanyaklago: Ng’at ma olocho, tho mar ariyo ok bi yude ngang’.’
12 “Ndik ne malaika mar kanyakla man Pagamam kama: Magi e weche ma jalo wacho, jal ma nigi ligangla mabith kendo mabor ma dhoge ariyo:
13 ‘Ang’eyo kama idakie, tiende ni kama kom-loch mar Satan nitiere; to e ma pod idhi nyime makori motegno gi nyinga, kendo ne ok ikwedo yie ma in-go kuoma, kata mana e ndalo mag Antipa ma ne en janenona mogen ma ne oneg e bathu kama Satan odakie.
14 “‘Kata kamano, an kodi gi weche moko manok, ni kanyo in gi joma omakore gi puonj Balam, jal ma nopuonjo Balak mondo oket gima kelo chwanyruok e nyim nyithind Israel, mondo gicham gik ma nosetimgo misengni ne sanamu kendo mondo gidonj e terruok.
15 Kamano e kaka intie bende gi joma omakore gi puonj mar kidieny mar Jo-Nikolao.
16 Omiyo, lok chunyi ia e richo. Ka ok itimo kamano, to abiro iri mapiyo, kendo abiro kedo kodgi gi ligangla mabor moa e dhoga.
17 “‘Ng’at ma nigi ite mondo owinj gima roho wacho ne kanyaklago: Kuom ng’at ma olocho, abiro miye moko kuom manna mopand, kendo abiro miye kidi,* kendo kuom kidino nobedie nying moro manyien mosendik ma onge ng’ato ang’ata mong’eyo, mak mana jalo monwang’e.’
18 “Ndik ne malaika mar kanyakla man Thiatira kama: Magi e weche ma Wuod Nyasaye wacho, jal ma nigi wenge ma chalo gi ligek mach ma liel, kendo ma tiendene chalo gi mula mosepwodh mobedo maler:
19 ‘Ang’eyo timbeni, gi herani, kod yieni, gi kaka itiyo ne Nyasaye, kod sinani mari, kendo ni timbeni ma sani oloyo ma ne itimo mokwongo.
20 “‘Kata kamano, an kodi gi wachni, ni iyie gi dhako ma Jezebel ma luongore owuon ni janabi, to opuonjo kendo olalo wasumbnina mondo gidonj e terruok kendo mondo gicham gik ma osetimgo misengni ne sanamu.
21 To ne amiye kinde mar loko chunye oa e richo, to ok odwar loko chunye oa e terruok.*
22 Ne! koro achiegni wite e otanda mar midekre, kendo joma terore kode achiegni wito e masira maduong’, mak mana ka giloko chunygi gia e timbe dhakono.
23 Kendo abiro goyo nyithinde gi tuo ma kelo tho mondo kanyakla duto ong’e ni an e ma anono paro ma iye ahinya* kod chuny dhano, kendo abiro chulou ng’ato ka ng’ato ka luwore gi timbeu.
24 “‘Kata kamano, ne un jomamoko man Thiatira, uduto ma ok luw puonjni, un ma ne ok uyudo thuolo mar ng’eyo gik ma jomoko luongo ni “gik matut, ma gin gik moa kuom Satan,” awachonu kama: Ok aketnu ting’ moro amora machielo.
25 To makreuru amaka motegno gi gima un-go nyaka chop abi.
26 To ng’at ma olocho kendo ma oluwo timbena nyaka giko, abiro miye teko mar locho e wi ogendni,
27 kendo jalo biro bedo jakwadh oganda kotiyo gi luth mar chuma, mi enotogi ma tindotindo ka gik mochue gi lowo, mana kaka an bende aseyudo teko koa kuom Wuora.
28 Kendo abiro miye sulwe mokinyi.
29 Ng’at ma nigi it mondo owinj gima roho wacho ne kanyaklago.’
Weche Moler Piny
^ Mani en kidi moro matin molworore kendo mapoth.
^ Wach molok kae ni “terruok,” e dho Grik en porneia, ma tiende en kit nindruok duto ma ok kare.
^ Tiende sie en, “nyiroke.”
