Jakobo 1:1-27
1 An Jakobo, misumba mar Nyasaye kod mar Ruodhwa Yesu Kristo, andikonu un dhoudi 12 mokere kuonde mopogore opogore:
Amosou!
2 Owetena, kwanuru ni en mana mor lilo sama uromo gi tembe mopogore opogore,
3 ka ung’eyo ni sama utimo kamano, yieu ma koro osekalo e temno nyago kido mar sinani.
4 To weuru mondo kido mar sinani ochop tichne chuth, eka ubed moromo chutho kendo malong’o e weche duto, ma ok urem e yo moro amora.
5 Omiyo, ka nitiere ng’ato e kindu mochando rieko, osik kokwayo Nyasaye, nimar Nyasaye chiwo rieko ne ji duto e yo mogundho ma ok omany ketho kuom ng’ato, kendo enomiyego.
6 To osik ka okwayo ka en gi yie ma ok oriw gi kiawa kata matin, nimar ng’at ma riwo gi kiawa chal gi apaka manie nam ma yamo tago kendo tero koni gi koni.
7 Kuom adier, ng’atno ok onego ogen yudo gimoro amora kuom Jehova;
8 en ng’at ma bagni e paro ariyo kendo ma ok ochung’ motegno e yorene duto.
9 To owadwa manie ngima ma piny mondo obed mamor nikech oseting’e malo,
10 bende, owadwa ma jamwandu mondo obed mamor nikech oseduoke piny, nimar mana kaka maua manie pap, jamwandu biro lal nono.
11 Mana kaka wang’-chieng’ wuok gi liet mager kendo miyo yien gi lum ner, kendo miyo maua mosethiewo kuomgi lwar mi bergi ma oko lal nono, kamano bende e kaka jamwandu biro lal nono e yorene moluworego.
12 Ng’at mamor en ng’atno ma dhi nyime nano e tem, nikech ka Nyasaye oseyie kode, ng’atno biro yudo osimbo mar ngima ma Jehova nosingo ne joma dhi nyime here.
13 Sama ng’ato ni e tem, kik owach niya: “Nyasaye tema.” Nimar gik maricho ok nyal temgo Nyasaye, to en owuon bende ok otem ng’ato ang’ata.
14 To ng’ato ka ng’ato itemo ka iywaye kendo ka iyondhe gi gombone owuon.
15 Eka gombono ka osetegno, onyuolo richo; kae to ka osetim richono, okelo tho.
16 Owetena ma ahero, kik wuondu.
17 Mich mabeyo duto gi chiwo malong’o duto a malo. Gilor piny ka giwuok kuom Wuonwa ma wuon gik ma chiwo ler manie polo, jal ma ok lokre kata ma ok sud kaka tipo.
18 Dwache ne en ni mondo onyuolwa kokalo kuom wachne mar adiera, mondo wabi wabed kaka kit nyak mokwongo mag chuechne.
19 Un owetena ma ahero, ng’euru wachni: Ng’ato ka ng’ato nyaka bed ng’at ma winjo wach piyo, ma terore mos kuom wuoyo, kendo ma terore mos kuom mirima,
20 nikech mirimb dhano ok chop gima kare e wang’ Nyasaye.
21 Kuom mano, goluru kit chilo duto kod gik maricho duto mondo gia kuomu, kendo urwak wach ma ichuoyo e iu ma en gima nyalo resou, ka utimo kamano e yor muolo.
22 Kata kamano, beduru joma timo kaka wach Nyasaye dwaro, to ok mana joma winjo kende ka uwuondoru uwegi gi paro ma ok adier.
23 Nimar ka ng’ato en mana ng’at ma winjo wachno to ok en ng’at ma timo, jalo chal gi ng’at ma ng’iyo wang’e owuon e kio.
24 Nikech ong’iyore owuon kae to owuok kanyo, to gikanyono wiye wil gi kaka ochalo.
25 To ng’at ma nono i chik kendo osiko ei chikno, ma en chik malong’o chuth ma miyo ji bedo thuolo, ok obed kaka ng’at ma winjo kae to wiye wil, to obedo ng’at ma timo ka luwore gi kaka idwaro; kendo obiro bedo mamor kuom time.
26 Ka ng’ato paro ni en jalam Nyasaye, to ok otue lewe, owuondo chunye owuon kendo lamo mare en kayiem nono.
27 Kit lamo maler kendo ma ok ochido e wang’ Nyasachwa kendo Wuonwa e ma: ni warit nyithi kiye kod mond liete e chandruokgi, kendo waritre wawegi mondo kik wabed gi mbala moro amora moa e pinyni.
